El míticu grupu asturianu anuncia la presentación en direutu del so nuevu discu, nel que recueyen el so conciertu XXX Aniversariu. Va ser el vienres 28 d’Avientu, de magar les 22:00 h., na sala Tribeca d’Uviéu
L’ésitu del conciertu col que Dixebra participó nel trescursu del Festival Intercélticu d’An Orient, en Bretaña, y que lluéu repitieron en setiembre del 2017 na capital del país como cellebración del so XXX Aniversariu, decidió al grupu a facer con elli un nuevu discu recoyendo los temes del mesmu.
El nuevu trabayu de Dixebra, una edición especial llimitada nun formatu que’l grupu define como “novedosu y especial”, podrá mercase nel mesmu conciertu presentación por un preciu especial de cincu euros. Nelli resalten les collaboraciones con dellos de los meyores músicos que tenemos anguaño nel panorama musical asturianu, como son: Jose Tejedor (gaita), Javi Tejedor (acordión), Rubén Bada (buzuqui y violín), Ángel Ruiz (banjo) y Toño Gómez (trombón) y l’aportación especial de Maxi Compán (voz) de Fe de Ratas. El soníu resultante, espectacular, ye un amiestu de rock contundente con folk y música asturiana.
Redaición InfoAsturies
This work is licensed under a Creative Commons Attribution 4.0 International License.
