Sngular, multinacional especializada en Teunoloxíes de la Información, va presentar güei n’Uviéu a empresarios, entamadores y profesionales les resultancies de la primer edición del so informe sobro la evolución del talentu y la xestión de persones na era dixital

Esti documentu, que lleva por títulu “Observatoriu de Talentu Autónomo Descentralizáu”, parte de la premisa de que nun momentu nel que se ta evolucionando escontra modelos dixitales, ye fundamental que se produza un cambéu nes persones que formen parte de la organización. “Si buscamos una nueva forma de xestionar les empreses, que resulte más eficiente y escalable pa poder siguir siendo competitives, tenemos d’entamar por xestionar el talentu d’una forma distinta”, diz l’informe na so introducción.

Partiendo d’esta base y de que la anovación tien nes persones al so principal aliáu, l’Observatoriu esquiza les distintes metodoloxíes d’organización y xestión empresarial que favorecen que les compañíes se tresfórmen dixitalmente y que ponen al trabayador nel centru’l negociu. Nesti puntu, el autores caltienen qu’aquelles organizaciones qu’adouten modelos menos xerárquicos, son capaces de dar autonomía a los sos emplegaos y tienen en cuenta les sos motivaciones, son les que consiguen meyores resultaos nes sos polítiques de captación y retención del talentu.

Estos tipos de modelos organizativos, qu’abogen por cadarmes empresariales más planes, faciliten los procesos de tresformamientu y que seyan más axilosos, cualidá esencial de les empreses que piensen y operen en clave dixital.

Sicasí, como señala l’informe, a naide se-y escapase qu’un de les principales torgues pa ello ye’l cambéu de cultura organizativa. “Nuna empresa dixital tien de primar la visión d’equipu, la comunicación y el trabayu collaborativo, cola eliminación de xerarquíes, y silos departamentales y d’información. Namá asina podrán abrise pasu les metodoloxíes axiloses, que dexen xenerar mayores eficiencies y que lleguen a poner a les persones perriba los procesos. Éstos esisten, pero creyáronse pa sirvir a les persones”, asegura Javier Martín, direutor d’anovación abierta de Sngular.

Finalmente, esti informe estrayi una riestra de conclusiones que deben de tener en cuenta les empreses que quieran afrontar con ésitu’l so procesu de dixitalización, como la necesidá de poner a los veceros como prioridá y de centrase nes persones pa consiguir el tresformamientu.

Primeramente, Jorge Prudencio, Reference Leader Software especializáu n’intelixencia artificial, va impartir un taller sobro asistentes virtuales, ayudantes conversacionales que tán modificando la forma de trabayar de los departamentos de serviciu al veceru.

L’eventu va tener llugar, de 16.00 a 20.00 hores, güei martes, 13 de payares, nes oficines de Sngular n’Asturies, asitiaes na cai Purita de la Riva, 6. 33008 Uviéu.

Redaición InfoAsturies

This work is licensed under a Creative Commons Attribution 4.0 International License.