Los cuerpos d’al menos 2.234 asturianos, achuquinaos pol franquismu y arrebataos a les sos families, continuen entierraos baxo’l monumentu al dictaor

La Universidá d’Uviéu calcula que ente Marzu y Setiembre de 1959 foron treslladaos más de dos mil asturianos dende los cementerios onde taben entierraos, en suelu asturianu. Sacáronlos de la tierra de Grau, Salas, Peñamellera Alta, Llanes, Valdés, Xixón y Tinéu. Sólo del Cementeriu de San Pedro de los Arcos arrincáronse más de mil calabres nel añu 1965, munchos d’ellos nin siquiera foren víctimes de la guerra, sinon d’una epidemia de gripe. Los cuerpos de 1.162 asturianos tan rexistraos con nomes y apellíos, d’otros mil caltriase qu’esi fore el so destín, seique nun se pueda demostrar, pero nel monumentu hai cerca diez mil muertos entá ensin nome.

Amparándose na llei 52/2007 de 26 d’avientu pola que se reconocen y amplíen drechos ya establécense midies favoratibles a quienes sofrieron persecución o violencia demientres la Guerra Civil y la dictadura, Andecha Astur vien de presentar una solicitú al “Principado” pa que cumpla coles sos funciones y tome les midíes afayaíces pa recuperar los restos de toos ellos, aprofitando la previsible exhumación del dictador español.

Reclamen la devolución a les sos families de los restos de los asturianos y, nel so casu, el so treslláu a Asturies, interviniendo direutamente naquellos casos nos que les families nun riquieran el treslláu de los sos familiares entierraos bien por desconocencia o por tenese por sumíu y asegurándose que se facilita a les families la información y la documentación necesaria pa la reclamación de los restos, comunicándose-yos previamente pa que puedan asistir si asina lo deseyen a la exhumación.

Llucía F. Marqués

This work is licensed under a Creative Commons Attribution 4.0 International License.