Caberos datos de probitú y desemplegu n’Asturies

  • 5 Payares, 2018

Un de cada venti asturianos vive del salariu social ya dos de cada diez menores vive en situación de probitú o riesgu. El paru sube n’ochobre en 2.055 persones. Son los caberos datos de la situación que se carez n’Asturies

Coyamos un colexu mediu asturianu: 400 escolinos repartios en clases d’a 25. Visualicémos un aula cualisquiera, la de segundo de primaria, por exemplu. Separtemos a tres: esos nun tienen garantizao l’acesu al material escolar -les beques nun cubren nin de lloñe les desixencies de los cientros educativos-, nun tan ciertos de dir a tener lluz en casa pa facer los deberes y probablemente güei tampocu lleven merienda pal recreo; nin suañar con participar nes actividaes estres y escursiones que, de manera cuasi mensual, hai que pagar al colexu. Comu ellos son 80 en tol colexu (más de xuro si tamos considerando un colexu públicu, nos privaos la ratio de probitú desciende). Arriendes d’ello, alrodiu de doce d’ente esos rapacinos tarán en situación de privación material severa, ello ye, que ye fácil que la única comida decente del día seya la que faen, si lu tienen, nel comedor. 28 viven en families nes que naide trabaya va más d’un añu, coles consecuencies non solo económiques, sinón sociales y anímiques qu’eso conlleva nel llar. Respiga.

Por supuestu, les families monomarentales, xunto colos emigrantes, son los que lleven la peor parte. El 35% de les families con un solu adultu a cargu carez de serios problemes económicos.

Un de cada venti asturianos depende del salariu social pa sobrevivir. Eso son más de 50.000 persones subsistiendo nuna situación llende y la cosa nun paez dir a meyor, con un incrementu del númberu de paraos rexistraos nos servicios públicos d’emplegu de 2.055 persones nel mes d’ochobre, que vienen a sumase a los 2.069 que perdieron el so trabayu en setiembre, más de 4.000 en dos meses. El turismu, col trabayu precariu ya estacional qu’ufre, ye más parte del problema que de la solución: en dalgunos de los conceyos más turísticos del pais (Cabrales, Cangues, Llanes, Colunga y Peñamellera Alta) el desemplegu subió más d’un 20% esti mes.

Como datu interesante, n’Asturies la probitú ye más acusada en families ensin reciella, a la contra de lo qu’ocurre n’España. Esi datu desplica parte del problema poblacional asturianu, ya que, por cultura, les pareyes asturianes nun se deciden a tener fios si nun tienen una estabilidá económica firme, que’n munchos casos nun aporta n’años, faciendo cayer xabazmente l’indiz de natalidá.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

This site uses Akismet to reduce spam. Learn how your comment data is processed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies