Leonor cree qu’algamará ser reina

  • 1 Payares, 2018

La monarquía española ya nun sabe que más trucos d’imaxen facer pa llavar la cara a una istitución chiscada de décades de basoria y corrupción; depués de l’abdicación del vieyu rei y visto que nin lo de subir al tronu a un heriederu más mozu y con prensa más discreta nin lo de querer facese pasar comu descendientes del Reinu d’Asturies foi abondu pa frenar el puxu republicanu, agora saquen al estráu a esta neña, convencía comu ta de que’l reináu Borbón aguantará fasta qu’ella seya reina. El Pueblu asturianu ya l’español nun tán tan ciertos

Noticia del díe: La Princesa d’España sabe lleer. “Con voz firme, ensin equivocase, soriente, mirando a cámara y faciendo les pauses precises”, destaquen los periódicos. ¡Uau!, impresionante, 13 años, les meyores escueles privaes y llee ensin trabase…

Pero centrémonos nel mensaxe. La princesina, toa guedeyes roxes y güeyinos, comu les de los cuentos, arrodiada de la so amorosiega familia ya engolada nun atril carmesí monísimu, nun vaciló al recordamos que cuenta con imponenos el so mandatu, subiendo al tronu d’España y perpetuando el modelu d’estáu más medieval d’Europa, obviando, eso si, l’orixe franquista del so puestu, pero cola inequívoca intención de sorayar el venceyu de la Corona cola Costitución y la so continuidá n’España.

Por si nun mos quedare claro, darréu el presidente del gobiernu d’España, Pedro Sanchez, dio lletura a un estrautu enforma oportunu: l’artículu 2, qu’afita que “la Costitución fundaméntase na indisoluble xunidá de la nación española, patria común ya indivisible de todos los españoles”; amás, a la salida del actu y faciendo gala d’una ablucante capacidá contorsionista, dellos de los llectores -pente los que se cuenta, comu non, Albert Rivera- venceyaron comu insepartables conceutos tan antagónicos comu “monarquía” y “democracia”.

Pero comu pente súbditos tamién hai niveles de vasallaxe, hebio lletures de la Costitución española en gallego ya en catalán. N’asturiano, nin suañalo. Nin falta que fae.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies