• Portada
  • >
  • Asturies
  • >
  • Ayer entamó la tercer fuelga de fame de los afeutaos d’AZSA

Ayer entamó la tercer fuelga de fame de los afeutaos d’AZSA

  • 31 Ochobre, 2018

Los trabayadores que carecieron intosicación por mercuriu por cuenta de la incompetencia d’Asturiana de Zinc entamaron la so tercer fuelga de fame

Pesi al alcuerdu del 2013 robláu con AZSA pol cual garantizábase-yos atención médica especialiada y ayuda económica pa aquellos que tean en riesgu d’esclusión social, la realidá ye que nun tán siendo afechiscamente atendíos, escareciendo d’especialistes que realmente conozan el so casu y teniendo qu’esperar por cites que se allarguen nel tiempu más allá incluso que la so esperanza de vida. En dellos casos, el costu mensual de les sos melecines supera los 900 euros. El sofitu económicu nun aporta.

Ente otros munchos problemes, les remortines de la intosicación inclúin hemorraxes, xaqueques, deterioru mental, perda de control muscular, cambeos d’humor, perda de memoria, problemes respiratorios, dolor crónicu, cayida de pieces dentales… El mercuriu presente na so sangre ta estrozando los sos órganos y les sos vides.

Cuando entamaron a trabayar aseguróse-yos esplicitamente que nun corríen dengún riesgu d’intosicación, polo que nun yera necesario l’usu de mázcaros nin otru tipu de equipación especial. Informes posteriores indicaron que’l llugar onde tuvieren trabayando taba invadíu de mercuriu. Los síntomes empezaron a los pocos dies d’entrar a trabayar, pero nun fueron teníos en cuenta con abonda rapidez y non solo nun s’aplicó’l tratamientu médicu necesariu pa qu’espulsaren del so cuerpu’l mercuriu, sinón que siguieron trabayando. Aseguróse-yos que nun quedara dengún restu de materiales de metales pesaos na planta.

Agora nun tán pidiendo responsabilidaes, anque ta claro qu’estes seríen d’Asturiana de Zinc, sinón daqué muncho más básico: atención médica y medios pa poder convivir de la manera más digna posible cola so enfermedá. Pa ello, y a pesar del so delicáu estáu de salú, empecipiaron una fuelga de fame, la tercera, esperando ser escuchaos y que se pongan tolos medios p’ameyorar el so nivel de vida.

Redaición InfoAsturies

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies