Espublizaes les normes pa la pesca nos rios asturianos na temporada 2019

  • 29 Ochobre, 2018

Los ecoloxistes acusen al gobiernu asturianu de ceder a les presiones de los pescadores, calteniendo la normativa prauticamente hermana a la d’años anteriores, entantu qu’estos culpen a les mabees del descensu de truches y salmones nos rios

Les normes pal exerciciu de la pesca n’agües continentales asturianes mientres la campaña 2019, que güei espubliza’l Bopa, malpenes se desemeya de la d’otros años, pesi al descensu de captures de truches y salmones nos principales ríos asturianos.

Pa los ecoloxistes, les décades d’esplotación masiva de los nuesos rios ta causando estragos na población d’estes dos especies, con presencia  acaldía más pequena nos ríos, raspiando en dellos casos la despoblación. La pasada temporada pescóse de media pocu más de la metá de salmones que n’años anteriores. Sicasí, esti añu concediéronse prauticamente les mesmes llicencies nes mesmes condiciones pa pescar nos ríos asturianos.

Especialmente grave ye’l casu de dos de los nuesos rios más salmoneros, el Sella ya’l l Cares, onde l’añu pasáu pescáronse un 70% menos de salmones, siendo con diferencia los calces nos que mas menguaron les captures, un 50% menos nel Eo, un 24% menos nel Narceau ya un 40% en Esva.

Dientro les midíes que la Coordinadora Ecoloxista d’Asturies reclamaba ta l’amenorgamientu del númberu de salmones por pescador en función de la cuenca, proponiendo la modalidá de pesca ensin muerte como alternativa, aumentando la talla mínima de les truches fasta 21 cm. en tolos ríos, -pa que queden más truches reproductores-especificar la prohibición de pescar de nueche y con ayuda de lluces artificiales y la creación de vedaos permanentes nes zones dedesove de ca ríu. Non solo nun s’atendieron los allegamientos, sinón que s’esanició la especificación de talla másima del salmón, afitada l’añu pasáu en 75 cm., col enfotu de salvar a les grandes femes de gran capacidá reproductora.

Les repoblaciones nun paecen tampoco una bona idega a los ecoloxistes, yá que s’inclúin especies alóctones estrozando la biodiversidá de los rios, amás de nun tar respaldaes por por nengún estudiu científicu.

Dende la CEA declararon sentise indignaos énte la nueva (pero cuasi igual) normativa, afirmando que “Si nun se tomen midíes valientes y radicales tantu al curtiu plazu como de futuru, ta poniéndose en pelligru especies emblemátiques como’l salmón; nun podemos dexar que los caprichos de los políticos ya’l plegamientu a los intereses de ciertes asociaciones de pescadores que, creyéndose propietarios del recursu, entienden a les truches y salmones, como de la so esclusiva propiedá, siguen fondiaos nuna idea estrautiva y depredadora de la pesca”

Redaición InfoAsturies

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

This site uses Akismet to reduce spam. Learn how your comment data is processed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies