“Nun tan les coses pa cellebraciones”: los grandes escaecios del Parque de Picos, les persones que lu moren, refugaron la convidación a los actos de cellebración del Centenariu del mesmu

Un espaciu natural hestóricamente habitáu, comu ye’l casu de Picos, nun sedría lo que ye ensin la aición ya’l curiau de les persones que viven nelli. Les xorrecientes torgues a les que se somete l’usu del Parque pa la ganadería y pastoréu faen ca vegada más dificil caltener esta forma de vida, que ye en si mesma padremoñu asturianu y que tendría de ser protexía comu un más de los recursos del Parque Nacional.

A la conmemoración acudieron delles personalidaes del gobiernu d’España y d’Asturies, la presidenta del Congresu los Diputaos, Ana Pastor, el Secretariu d’estáu de Mediu Ambiente, Hugo Morán, el responsable de la rede de Parques Nacionales, dellos diputaos, senaores y representantes del gobiernu del “Principado”, alcaldes de Cangues y Cabrales, la delegada del Gobierno de España en Asturies, el másimu responsable de la rede de Parques Nacionales, el secretariu d’Estáu de Mediu Ambiente y dellos trabayaores del Parque, peron nun foi nin un ganaeru, nin  dengún vecín de los pueblos del Parque Nacional de Picos.

Tolos presentes posaron pa la semeya y convinieron en dase palmaines nel costazu, emponderar al impulsor del Parque, Pedro Pidal, ya en dicir que faen falta más recursos económicos pal Espaciu Protexíu de Picos, llegando a mencionar los “usos tradicionales” qu’ellos mesmos dificulten.

Pel so llau, los hestóricos moradores de la fastera, pastores, vecinos y ganaderos -xunto col alcalde d’Onis que se xunió a la protesta- quisieron facer esti vacíu, non solo a esti actu sinon a tolos que se tan cellebrando por mor del Centenariu, pa con ello visibilizar la so refuga a comu se ta xestionando el Parque, especialmente no que cinca a restricciones a les que se tienen que someter nel so díe a díe (usu del espaciu, control de fauna, desbroces, pasos y caminos) pero que se pueden saltar ensin problema cuando vien una princesa de visita.”Sentimos que sobramos nesti parque” declararon.

Llucía F. Marqués

This work is licensed under a Creative Commons Attribution 4.0 International License.