Los Sidrocoles lleven once años  llevando a les escueles del país el so llagarín, col oxetivu de que la reciella conoza la cultura de la sidra ya’l so procesu d’ellaboración

El Colexu Públicu d’Educación Especial San Cristobal, n’Avilés, foi esti añu el que tuvo la suerte d’entamar la temporada d’escuela sidrera. Los 84 escolinos qu’asisten al cientru pasaron pelos mayos, la mayaora y la prensa, participando con enfotu  pa llueu esfrutar xuntos de la sidre’l duernu recien fecho por ellos.

A partir d’agora, y nos dos meses vinientes, sedrá la temporada de mayor actividá pa los Sidrocoles, ya que anque los talleres sidreros impártense a lo llargo tol añu y pa xente de toles edaes, les meyores feches pa participar nun Sidrocole ye’l caberu trimestre: tiempu de pañar y mayar, dos de les actividaes que más presten a la reciella. Colexos de tol país participen nesta prestosa aniciativa, que’n dellos casos se fae al tiempu que’l magüestu, seique nun ye imprescindible.

Nel taller de pañar, los neños y neñes desplácense a una pumarada, onde amás de pañar la mazana conocerán les carauterístiques organoléutiques de les mazanes y detalles sobre les munches variedaes propies de mazana de sidre qu’hai n’Asturies. Otres de les posibilidaes son visitar un llagar nestos díes pa que vean in situ cómo se trabaya nun llagar en tiempu de mayanza, siempre acompañaos colos comentarios y esplicaciones del llagareru y los monitores de Sidrocoles, semar un pebidal – dientro’l Plan de Recuperación Pomolóxica- y llantar un pumar na escuela, o dar un tallerín d’echar sidre. Sicasí, la mayada ye ensin dubia el taller más demandáu, siendo asina que anque los Sidrocoles duplicaron el so equipu ya queden poques feches llibres pal mes de Payares.

Los colexos, istitutos o asociaciones interesaos en participar en dalguna d’estes actividaes o n’algamar información, pueden ponese en contautu colos Sidrocoles nel teléfonu 684644711.

Redaición InfoAsturies

This work is licensed under a Creative Commons Attribution 4.0 International License.