• Portada
  • >
  • Mocedá y reciella
  • >
  • El 94’2% de la mocedá asturiana piensa que l’asturianu merez el mesmu tratamientu que’l catalán, gallegu o vascu

El 94’2% de la mocedá asturiana piensa que l’asturianu merez el mesmu tratamientu que’l catalán, gallegu o vascu

  • 24 Ochobre, 2018

L’estudiu  “La mocedá y la llingua asturiana” apurre datos esperanzaores, con un sofitu cuasi absolutu a la llingua por parte de la mocedá que vive n’Asturies, pero tamién dexa entrever la falta de comprensión de términos comu “oficialidá” y los efeutos de la represión llingüística nes nueves xeneraciones

L’asturianu ye, ensin dubia, una llingua al nivel del catalán, gallegu o vasco, polo que tien que recibir el mesmu tratu, ya que lo contrario ye negar a los asturianos el so drechu. Eses llingües son oficiales, ergo “el mesmu tratu” implica oficialidá. Sicasí, acordies l’estudiu desendolcáu pola Academia la Llingua Asturiana ya’l Conseyu de la Mocedá, el 93% ta d’alcuerdu cola primer parte de la afirmación (ye una llingua) , el 94’2 cola segunda metá (tien los mesmos drechos) ya’l porcentaxe baxa incomprensiblemente al 86’1% na tercera (oficialidá)

Ensin dexar de ser un datu mui positivu, esi 86% espeya que polo menos el 8% de los encuestaos desconoz el significáu y les implicaciones del términu “oficialidá”, una y bones ye contradictorio defender la igualdá de tratu coles llingües oficiales ensin pidila; oficialidá ye un términu que los medios de comunicación más españolistes traten de demonizar con toa triba de menacies, a cual más surrealista.

L’estudiu, fechu con una amuesa qu’abarca la mocedá que vive n’Asturies (incluyendo aquellos que nun tienen orixen asturianu (incluyendo aquellos que no tienen origen asturiano, colo que podemos ver l’altu gráu d’inclusión llingüística de los recién llegaos) d’ente 16 y 29 años, ufre más datos interesantes: un 85’1 % d’ente ellos considera l’asturianu la llingua d’Asturies, con un altu 22’1% que considera que l’español nun lo ye, ello ye, que namás l’asturianu ye llingua d’Asturies.

Seique cuasi la totalidá de los encuestaos pescancien asturiano (menos del 50% asistió a clases de llingua) y que la mayoría lo usa más en contestos privaos, a la hora de falar en públicu o en relaciones más oficiales (profesoráu, mélicos, alministración) la tendencia ye usar l’español, seique un importante 26’2% afirma usar l’asturianu tamién nestos ámbetos.

Esti estremar pente l’ámbetu públicu ya’l priváu amuesa que la nuesa mocedá sigui careciendo un problema d’autoestima llingüística deriváu de décades de represión nes que los español-falantes nun dubien en correxir al astur-falante, finxendo incomprensión, reñéndolu ya incluso ridiculizándolu: ye necesario tener una concenxa perclara de los propios drechos y de la emportancia d’usar el propiu idioma pa sobrepasar esa presión, diendo per delantre col asturianu, y más del 26% de la mocedá asturiana faelo.

No que cinca al sistema educativu, un importante  77’2% de la mocedá considera que l’asturianu tien de ser veicular nes escueles, porcentaxe que sube al 80% cuando s’entruga pola presencia del asturianu n’educación.

Tou ello debuxa un prestosu escenariu qu’amuesa que les nueves xeneraciones tienen bien nidio cuales son los sos drechos y que la única torga pa una oficialidá darréu, aplicada con toles sos consecuencies, son los porgüeyos políticos y l’ansia de represión d’unos políticos “asturianos” que respuenden primero ante Madrid qu’ante’l Pueblu Asturianu.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

This site uses Akismet to reduce spam. Learn how your comment data is processed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies