El XIX Seminariu d’Estudios Asturianos de la Fundación Belenos va cellebrase los díes 17 y 18 de payares, na Puela d’Allande, cola tema “Al otru lláu de la mar, Asturies y les rellaciones atlántiques na dómina antigua”
El sábadu 17 ta acutáu pa la presentación de ponencies coles intervenciones, n’horariu de mañá, de Jorge Camino Mayor, arqueólogu del Muséu Arqueolóxicu d’Asturies, que falará de les conexones atlántiques na Prehistoria recién d’Asturies, Fernando Alonso Romero, hestoriador de la Universidá de Santiago de Compostela, cola conferencia “Les embarcaciones y navegaciones nel mundu celta de la Edá Antigua a l’Alta Edá Media” Iván Muñiz López y Alejandro García Álvarez, arqueólogos participantes nel Proyeutu arqueolóxicu del Castiellu de Gauzón, que nos falarán d’esti comu fortaleza medieval nel comerciu del Arcu Atlánticu.
Depués de la xinta, Cristobo de Milio Carrín, etnógrafu de la Fundación Belenos intervendrá con “Motivos celtes nel folklor asturianu: otra preba del venceyu atlánticu”, siguíu pola charra d’Iván Huerga Antuña, filólogu y profesor “Celtes de nenyuri y perdayuri. Un resume de la teoría atlantista y del estáu actual de la cuestión”.
Una folixa asturiana de nueite nel “Café Centro”, con música’l país, rematará esta primer xornada. El domingu tará dedicáu a conceyu abiertu, cola participación de dellos ponentes y miembros de la Fundación Belenos, previa proyeición d’un audiuvisual.
El preciu de la matrícula ye de 35 € . Amás, esiste la posibilidá d’agospiu opcional en réxime de pensión completa en “La Nueva Allandesa” a un preciu por persona de 100 €, con plazu másimu del 14 payares. Pa más información sobre’l XIX Seminariu d’Estudios Asturianos pue contautase cola Fundación Belenos nos teléfonos 985244811 / 616242319 o nel corréu lletrónicu seminariubelenos@gmail.com. www.
Nuria Prendes
This work is licensed under a Creative Commons Attribution 4.0 International License.
