La retirada de los ocalitos de la Reserva de la Biosfera del Ríu Eo ye una bona anuncia pa la hestórica llucha escontra la invasión de los nuesos montes por especies alóctones de rápidu xorrecimientu, comu l’ocalitu y el pinu, dañibles en sigo mesmes polos sos efeutos nocivos sobro’l suelu y sobro la flora y fauna autóctones y bultablemente pelligroses pol so efeutu como propiciadores y propagadores d’incendios
N’Asturies cuasi’l 20% de la superficie arbolao ta llantada d’ocalitos, algamando concentraciones del 100% en dellos conceyos y alrodiu’l 70% en tola rasa costera d’Oriente a Occidente, que ye onde se concentren la mayoría de los llantíos, siendo especialmente grave en conceyos tan densamente poblaos como Avilés, Carreño, Corvera, Gozon, Pravía y Castropol.
Dende l’aniciu de los primeros llantíos d’ocalitales, la firme oposición de los asturianos al so espardimientu vien siendo desoyía poles alministraciones, que deciden siempres a favor de les empreses maereres y papeleres.
De ehí la emportancia d’esti primer conveniu, robláu pol Conceyu de Castropol, EdP Enerxía y el “Principado”, pa esaniciar la presencia d’ocalito na marxe asturiana de la ría del Eo, anunciada tres el conceyu del muérganu de xestión de la Reserva de la Biosfera Ríu Eo, Oscos y Terras de Burón. L’actuación, que se complementaráscol proyeutu Life Fluvial que se desendolcará na vega d’esti ríu, ye una perbona anuncia non solo por recuperar una fastera de descomanada emportancia, sinón por aniciar un precedente nel que se reconoz oficialmente la necesidá de la esapaición d’esta especie y se tomen midíes al respeutu.
Llucía F. Marqués
This work is licensed under a Creative Commons Attribution 4.0 International License.
