El so llugar esi díi “sedrá na manifestación que tolos años l’Asturies Real cellebra en frente de la Gala pa deci-yos a quien intenten conservar los sos privilexos a costa de la mayoría social, qu’Asturies nun rinde pleitesía a Fartones nin a Borbones”

Nun son los primeros: ca añu hai estudiantes que, siendo convidaos pola escelencia de los sos espedientes a l’audiencia y receición colos reis d’España, deciden refugar la invitación y dexen plantada a la monarquía. Sicasí, Diego Fernández y Juan Martínez, los antiguos estudiantes de pedagoxía y sicoloxía qu’esti añu refuguen acudir a la presencia del rei destaquen pola claridá y la contundencia de les sos declaraciones.

Cola so aición Diego y Juan xúnense a la refuga del Pueblu Asturianu a la imposición de la monarquía española, negándoyos esplicitamente honores, saludos o vasallaxe.  Nel comunicáu qu’unviaron a la direutora de la fundación, Teresa Sanjurjo, espeyen nidiamente la postura d’una parte ca vegada más amplia del Pueblu Asturianu:  una monarquía d’orixe franquista, corrupta, venceyada a la venta d’armes y a les piores dictadures nun los representa nin pue representar al Pueblu Asturianu.  Poro, nun participarán nel “llaváu de cara” de la istitución, sinon que tarán del otru llau, na manifestación que, comu tolos años, xuntará a miles d’asturianos na refuga de la monarquía española.

Juan y Diego tienen nidio que los miles de millones que los miembros de la fundación y de la monarquía roben y marafundien taríen meyor invertios en consiguir una universidá bramente pública y de baldre. “Aquellos que mos conviden a sacar una semeya con los Reis d’España, trabayen tolos díis incansablemente pa torgar los nuesos suaños y los de miles de mozos y moces de families humildes”, declararon, ensin escaecer a tolos estudiantes que nos caberos años se vieron forciaos a dexar la universidá por motivos económicos, o a los que tuvieron que trabayar  al tiempu que sacaben la carrera, pa pagase los estudios. Pente los culpables citen a banqueros comu los Botín, evasores fiscales como los Masaveu y los Cosmen, donantes illegales del PP comu Villar Mir, y “otros destacaos miembros de les élites económiques y empresariales d’Asturies y del Estáu Español, miembros del Patronatu de la Fundación Princesa de Asturies. Esta Fundación ye la organizadora de los Premios, pero la realidá ye qu’actúa de facto a mou de “corte real empresarial”, de los Borbones, siendo munchos d’ellos responsables del aumentu de las desigualdaes sociales, de la progresiva elitización y privatización de la Universidá pública y del sufrimientu de munches persones”.

This work is licensed under a Creative Commons Attribution 4.0 International License.