• Portada
  • >
  • Conceyos
  • >
  • Cuatro candidatures opten al Premiu Internacional DDHH Conceyu de Sieru

Cuatro candidatures opten al Premiu Internacional DDHH Conceyu de Sieru

  • 16 Outubro, 2018

La Flotina de la Llibertá, el Movimientu Popular Hirak del Rif (Marruecos), Walking borders (Caleyando Llendes) y los 24 Presos Políticos de Gdeim Izik (Sáhara) son les cuatro asociaciones qu’opten esti añu al Premiu Drechos Humanos de Sieru

Cada añu el Conceyu Sieru otorga esti premiu a l’asociación qu’al so entender más trabayare a lo llargo l’añu a la defensa de los Drechos Humanos nel mundiu. L’añu pasáu foi a parar al COPINH, que sinifica Conseyu Cívicu d’Organizaciones Populares ya Indíxenes d’Hondures.  Esti añu, cuando entá nun finó el plazu de presentación de candidatures, son cuatro los posibles ganaores.

Movimientu Popular Hirak del Rif

Surdíu de magar l’asesinatu, a los trenta años, del pescaor Mouhcine Fikri, en Alhucemas el 28 d’ochobre de 2016, pilláu a costafecha por un camión mientres desafiaba la confiscación de la so pesca. Esti movimientu popular ya independiente  llucha polos drechos económicos, sociales y culturales del pueblu marroquí.
Un de los sos cabezaleros,  l’activista rifeñu Nasser Zefzafi ta nomináu al Premiu Sájarov pa la Llibertá de Conciencia, un premiu afitau pol Parlamentu Européu en 1988 y que homenaxea a persones enfotaes na defensa les llibertaes y drechos humanos.

Campamentu de Gdeim Izik (Dignidá)

Pente Ochobre y Payares de 2010, decenes de miles de saharauis acamparon en Aáiun, desixendo respetu polos sos drechos sociales, civiles y políticos. Esta protesta pacífica foi duramente reprimía pol Reinu de Marruecos, siendo prindaos 24 activistes a los que se condergó a penes d’ente 20 años y cadena perpetua.
Espuestos a continues violaciones de Drechos Humanos, los 24 presos políticos son un exemplu de la llucha diaria del Pueblu Saharaui pol so drechu a la autodeterminación.

Caleyando Llendes. Walking borders

El trabayu d’esti coleutivu consiste nel sofitu a les redes migrantes de magar el 2001, sensibilización, coordinación con otres onx’s y denuncia.

Helena Maleno Garzón, defensora de los drechos humanos con persones migrantes na frontera sur española con esta asociación, vien recibiendo dellos premios de Drechos Humanos, qu’avalen el so llabor en defensa de los drechos de les persones en movimientu.

Flotina de la Llibertá

La Coalición Internacional de la Flotina de la Llibertá ye un movimientu de solidaridá interpersonal compuestu por campañes ya iniciatives de tol mundiu que trabayen xuntes pa finar col bloquéu de Gaza. Los Drechos Humanos tán nel centru’l so cometíu, defendiéndolos en tol mundiu, ensin tener en cuenta raza, xéneru, tribu, relixón, etnia, nacionalidá, orientación sesual, ciudadanía o idioma.Propuesta pol CSCA (Comité de solidaridá cola Causa Árabe), estos barcos tripulaos por persones de 40 nacionalidaes estremaes lleven de magar l’añu 2010 tratando de francer el bloquéu illegal a la franxa de Gaza, con envíos d’aida humanitario.

Los cuasi dos millones de palestinos empresllaos nuna superficie de 350 kilómetros cuadrados carecen una situación cercana al “colapsu” pola falta de servicios básicos ya’l desaniciu de les infracadarmes, acordies l’informe de la ONU, en permanente falta d’alimentos y medicines, con un desemplegu sistémicu qu’afeuta a la metá de la población, un abastecimientu lléutricu reducíu a unes hores diaries y d’agua a unes hores selmanales.  A ello hai qu’amiestar los periódicos bombardeos de la aviación israelí.

Ante esta llaceria 750 persones de 40 países entamaron el primer viaxe na primavera de 2010 col envís de francer el bloquéu de Gaza. El primer unvíu, seis buques con más de diez mil tonelaes de sofitu humanitariu, prevocó un ataque israelí con un saldu de 10 cooperantes muertos y más de 50 firios, torgando la llegada a la costa palestina.

Na campaña de 2018 dos embarcaciones visitaron Xixón como reconocimientu al compromisu y la solidaridá de los asturianos cola causa palestina.

Redaición InfoAsturies

 

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies