Seique fasta l’intre naide revindicó l’autoría de la pintada fecha nel recién naguráu Mirador de La Princesa, na que se pue lleer “Borbones Fuera, República Asturiana” per un llau ya “Independencia y Socialismu” pel otru, con ella queda espeyáu el sentir de los asturianos hacia la monarquía española: les caberes encuestes amuesen que namás alrodiu’l 20% de los que viven n’Asturies son favoratibles a esta istitución La organización nacionaliega Andecha Astur, que llanzare recientemente la campaña “República Asturiana” niega l’autoría de la pintada, seique reconocen que “Nun podemos reivindicalo, pero prestar, préstamos” y atribuyen la importancia que se ta dando al fechu -al fin y al cabu nun se ven daños materiales acullá de les pintaes- a la dificultá por parte de los medios más españolistes pa enfrentar la rialidá d’una Asturies “que nun se rinde, que nun se presta a vasallaxe al Rei español, y qu’apuesta pola Republica Asturiana”.

Énte les declaraciones del alcalde de Cangues, tildando de “cobarde” al actu de pintar y estrozar en recién naguráu mirador de la Princesa, dende Andecha Astur retruquen reclamando-y responsabilidaes poles inregularidaes cometies na so costrución y el dañu a la reserva natural, acusándolu de combayar cola monarquía española en llugar de defender los drechos de los cangueses y de los asturianos “Cobarde ye permitir facer pistes y llevantar esi mamotretu nun Parque Nacional, onde los vecinos nun puen nin rozar una sebe, y llueu dir a rendir vasallaxe al Rei español… arrodiaos de Guardia Civil”.

Los pastores de la fastera y vecinos de Cangues ya manifestaren nel so díi la so indignación ante la costrución d’otru mirador (con esti ya son trés) y del camín que lleva fasta elli, pel mediu’l Parque Nacional, cuando a ellos nun se-yos permite siquiera llimpiar los caminos pa facilitar el curiáu del ganao.

Nuria Prendes

This work is licensed under a Creative Commons Attribution 4.0 International License.