El prósimu 12 d’ochobre Andecha Astur cellebra como tolos años el so homenaxe a la Revolución asturiana d’Ochobre del 34, delantre la tumba del presidente Belarmino Tomás
El vienres 12, a les 13 h. nel Cimenteriu Pando –Llangréu- , delantre de la tumba d’un de los más emportantes protagonistes de la hestoria asturiana del caberu sieglu, tendrá llugar la ufrienda floral cola qu’añalmente se rinde homenaxe a a República Obrera y Campesina d’Asturies, declarada n’Ochobre del 34, y al Pueblu Asturianu “que protagonizó la hestórica revolución y que la defendió cola vida frente al exércitu de la República Española”.
Dende Andecha Astur destaquen que “los fechos hestóricos d’aquellos asturianos y asturianes son un exemplu perenne pal nuesu Pueblu, y una alternativa siempres presente frente al proyeutu d’esfarrapamientu, esaniciu, paru, precariedá, emigración forciada de la mocedá y asimilación colonialista que l’Estáu español tien entamáu p’Asturies”.
La fecha escoyía asitiase metanes del periodu revolucionariu asturianu, siendo al mesmu tiempu relevante pola sinificación españolista d’esi díe, nel que l’Estáu español cellebra una teórica “Hispanidá”, cellebración que p’Andecha Astur “nun ye más que una xornada d’esaltación del so patrioterismu colonialista”.
El llugar elexíu tamién ye sinificativu: el cementeriu llangreanu nel que descansen los restos de Belarmino Tomás, presidente del Conseyu Soberanu, presonaxe de gran relevancia na revolución d’Ochobre ya interllocutor col exércitu republicanu español na negociación d’una rendición pautada, con unes condiciones que lluéu los españoles nun respetaríen, aniciando una represión sangrina y xabaz ya invadiendo militarmente el país. Esta circustancia compárase dende la organización nacionaliega, salvando les distancies, cola actuación de les fuercies de seguridá del mesmu estáu español pa torgar voluntá del Pueblu Catalán de decidir llibremente’l so futuru.
Redaición InfoAsturies
This work is licensed under a Creative Commons Attribution 4.0 International License.
