Reciella espoxiga

  • 8 Ochobre, 2018

La tradicional xuntanza de families pol asturianu aconceya ca añu a más rapacinos nel Díe la Reciella 

Ayeri domingu el Muséu del Pueblu d’Asturies, en Xixón,  foi escenariu de la cita añal de Reciella, un eventu qu’aconceya a cientos de families asturfalantes enfotaes en tresmitir a les nueves xeneraciones la nuesa llingua y cultura. El llema d’esti añu, Espoxiga, nun pudo ser más acertáu, non solo porque los primeros neños y neñes que participaron en Reciella ya medraron enforma nestos seies años, sinon porque ca añu son más les actividaes propuestes y más les families que s’averen a compartir esta xornada d’arruelu y revindicación tan prestosa.

Nin siquier la lluvia de la mañá torgó a los más madrugaores participar na III Entaina, la carrera de families pol asturianu na que se simboliza’l pasu del  testigu’ l’asturianu de xeneración en xeneración, esti añu protagonizáu por tres muyeres de la  familia Trancho, ma, fia y ñeta. De magar entós asocediéronse los conciertos, talleres y actividaes pensaos pa la reciella, pero de los que los pas y mas tamién esfrutaron. A lo llargu’l díe hebió ocasión de debuxar, baillar, grabar vidios pa youtube, canciar, xugar a la cuatriada y a otros xuegos del país, prauticar el baloncestu con xugaores d’élite y participar nuna xincana per tol Muséu. La danza prima remató una xornada prestosa que fae presaxar lo meyor pal futuru l’asturianu.

Nuria Prendes

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

This site uses Akismet to reduce spam. Learn how your comment data is processed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies