En menos de 7 díes, una tolina y una osa muerren n’Asturies pol desdexamientu del “Principado” pola nuesa fauna. Nun esiste dalu protocolu d’actuación pa estos casos y a los únicos espertos en recuperación de fauna marina, el CEPESMA, retiróseyos toda ayuda

Los dos animales pasaron dellos díes agonizando publicamente ensin que la naguada intervención de los espertos que podríen salvalos aportare a tiempu.

El casu de la tolina de Llanes fízose viral polos tres díes que pasó dando vueltes perdía pel Puertu ensin que naide fuera quién a salvala. Les redes enllenáronse de pidiciones d’intervención, pero nun hebio rempuesta y dende’l “Principado” nun unviaron a los espertos que podríen salvala. Sicasí, nun foi la primer tolina del añu, mesmamente en xunetu morrieron cuatro tolines nes costes asturianes en menos de 48 hores. La llabor de recoyer, curiar y devolver a la mar cuando fore posible estos animales foi durante años una prioridá pa la Coordinadora pal Estudiu y Proteción de les Especies Marines (Cepesma), qu’a traviés de la so Rede de Varamientos atendía y salvaba a los animales que quedaren varaos na costa, pero esta rede lleva dos años inoperativa pola retirada de fondos del gobiernu del Principáu, polo que nesti intre la fauna marina ta desprotexía dafechu, ensin que furrule n’Asturies dalu cientru de recuperanza d’animales marinos, ensin que se cuente con presonal formáu nin medios afayaizos pa esta triba d’atención.

La gravedá del casu de la osa estriba na situación de pelligru na que s’alcuentra esta especie, na que se tan invirtiendo millones, teoricamente pa la so recuperación. La muerte d’un exemplar de fema n’edá fértil ye una perda descomanada.

Dende que a les once de la mañana se recibió l’avisu de la presencia d’un osu pardu feríu nuna carretera del cientru d’Asturies, en Proaza, dica la so muerte, camín d’un albeite, pasaron cerca de seies hores nes que nun se punxo en marcha dalu protocolu d’actuación pa ponela a salvu, cenciellamente porque nun esiste. La fastera onde apaeció forma parte d’una de les más importantes árees de reprodución osera de la Cordillera Cantábrica, polo que debería esistir un equipu d’espertos preparaos p’actuar nestos casos. Nun lu hai. Asturies nun tien la más mínima cadarma p’atender estos casos. La osa morrió n’ambulancia, tres de ser garrada con anestesia y treslladada nuna ambulancia, camín d’Uviéu. L’anestesia foi demasiao pa un cuerpu ya feble, pero d’aportar a la clínica tampocu cuntaría coles istalaciones afayaices pa la so cura y muncho menos pa la so recuperación posterior.

A estos casos podemos sumar les muertes por desdexamientu de los caberos gallos monteses y les muertes intencionaes de llobos y xabariles pa finar de debuxar la llamentable situación de la fauna asturiana. El “Principado” nun se plantega costruyir un cientru de recuperación d’animales, nin marinos nin terrestres. Los moraores d’Asturies, ya seyan presones o animales, son la so cabera prioridá.

Llucía F. Marqués

This work is licensed under a Creative Commons Attribution 4.0 International License.