• Portada
  • >
  • Mundiu
  • >
  • La Diada caltién el nivel con más d’un millón d’asistentes

La Diada caltién el nivel con más d’un millón d’asistentes

  • 12 Setiembre, 2018

Nin desmovilización nin retirada. Si la Diada d’ayeri tenía de valir pa medir l’estáu del independentismu catalán depués d’un añu de desgaste, la rempuesta ta nidia: los catalanes siguin dimpuestos a salir a la cai pol so país

La represión del referendum del 1O, el 155, la guerra los llazos y la mediática, el cansanciu, la tensión y l’acosu al que los españoles someten en tolos frentes al independentismu catalán… tou ello nun foi quien a facer recular a un pueblu que tien pernidio cuala ye la so opción.

Esta vegada’l collor nun foi el mariellu: como si quinxeren despistar, la conseña yera ayeri la camiseta encarná, más d’un millón d’elles enllenando ampliamente la Diagonal y les cais averaes, col presidente, Quim Torra, a la tiesta.

Sicasí, falta agora definir el camín pel qu’empobinar toa esta enerxía, pa dalgunos falta una fueya de ruta concreto que marque los pasos a dar, más allá d’esperar el xuiciu a los principales representantes políticos, ya’l discursu del presidente nun resolvió esa duda.

Dempués d’años de sintonía pente la vía istitucional y les entidaes soberanistes, ayeri la presidenta de la ANC, Elisenda Paluzie, posó deberes al Gobiernu y a los partíos encamentando  al executivu catalán a dexar “de implorar permisos del Estáu que nun van aportar enxamás” y a  preparase otra vegada “pa un embate democráticu”. Amás, depués de que Turra aportunara los caberos díes a reclamar una movilización permanente dica’l xuiciu, criticó “que tou lo tien que faer la xente de la cai”.

La representante de los Comités de Defensa de la República (CDR) desixó al Gobiernu desobediencia: “Nun vos votamos p’axustar la rindición”.Pel so lláu, el vicepresidente d’Òmnium, Marcel Mauri dirixió los sos principales mensaxes al presidente del gobiernu español, Pedro Sánchez “Esto quiciabes nun va ser rápidu nin fácil, pero vamos trabayar ensin fuelgu pa llograr esta República de too el mundu y pa tol mundu”.

Entantu, medren per tol mundiu llazos mariellos de solidaridá col pueblu catalán ya en reclamación de llibertá pa los presos políticos que caltién el estáu español -los catalanes y los demás-.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

This site uses Akismet to reduce spam. Learn how your comment data is processed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies