Esti Díi de la Nación Asturiana ye especial por dellos motivos. 1.300 años d’hestoria nacional, una visita de la monarquía española, más d’un millón d’euros en gastos y tres postures estremaes ante’l mesmu que retraten quien ye quien na Asturies de güei

La monarquía española preséntase’n Cuadonga como soberana del Pueblu Asturianu n’ún más de los actos de llaváu de cara d’una istitución podrecía dende’l so orixe. Nun son pocos los asturianos que rendirán sumisa pleitesía a la princesina, convenientemente afalaos polos medios de comunicación, les facilidaes lloxístiques en forma d’autobuses de baldre y la ignorancia.

La izquierda asturiana reclamará la república y la soberanía pal Pueblu Asturianu, enfrentándose ensin esconderite al poder afitáu, nuna marcha de siete Km de Les Arriondes a Cangues d’Onís y posterior manifestación, qu’acomuña a más de venti organizaciones con un mesmu enfotu antimonárquicu. Revindicación ya identidá nun actu de dignidá nun intre nel que, comu poques vegaes, Asturies necesita una rempuesta popular que lleve al cambiu ya’l reñacimientu.

En tercer llugar, los folixeros folclóricos vaciarán de conteníu el Díi d’Asturies, convirtiéndolu nuna romería más de los cientos que se cellebren n’Asturies a lo llargo l’añu. Conciertos, sidre, xinta y xuegos, ya seya en Casu o en Xixón, mirarán pa otru lláu con tal de nun posicionase -republicanos, si, pero representaos pol rei, nun oxímoron de llibru- y con tal d’entretener a la población y desviar l’atención de los asturianos de los problemes que carecemos.

Tenéis tol díe per delantre pa decidir a que grupu pertenecéis. Prestosu Díi de la Nación Asturiana.

Llucía F. Marqués

This work is licensed under a Creative Commons Attribution 4.0 International License.