La fuercia simbólica de Cuadonga nel incosciente coleutivu de los asturianos

  • 7 Setiembre, 2018

Roberto González Quevedo y Mariano Suarez compaxinaron les sos intervenciones pa dar una visión conxunta completa de la fuercia simbólica de Cuadonga, del so usu políticu ya les sos implicaciones na costrución de la identidá asturiana a lo llargo la hestoria

Roberto González-Quevedo, filósofu, doctor n’antropoloxía y llingüísta, miembru de númberu l’Academia de la Llingua Asturiana  y direutor de la revista Cultures, analizó Cuadonga dende’l puntu de vista antropolóxicu, afondando nos rituales políticos asociaos al mitu de Cuadonga y espeyando como, mas allá de la folklorización y la manipulación política de la hestoria de Cuadonga, los mensaxes siguen llatiendo na visión del mundiu de los astures.

Nesi contestu, desplicó la escoyeta de 8 Setiembre comu Díi la Nación Asturiana y la visita planeada pa mañana pola monarquía española: “La vitalidá y la bayura simbólica del mitu faese con más puxu en momentos de transición, de crisis y cambiu”.

Pa González Quevedo, esti “mal usu” del ritual tiende antropolóxicamente a ser iguau pola sociedá mesma. Nesti casu, afitando’l calter asturianu d’esta conciencia hestórica y coleutiva. “En resume, el mitu, la lleenda y l’alcordanza de Cuadonga vive nel inconsciente y la memoria coleutiva de los asturianos como un mitu d’aniciu, d’orixe, fundamentu primordial de la identidá asturiana. Ye por tantu normal que dende Asturies la xente esmolío pol presente y pol futuru d’Asturies sientan alarma porque se-y quiera quitar al pueblu asturianu esta memoria primordial de la so identidá hestórica y política”.

Na segunda intervención Mariano Suárez desgranó “les diez Cuadongues”, ello ye, los diez momentos de la hestoria d’Asturies nos que’l mitu de Cuadonga demostró la so fuercia, nun maxistral resume nel qu’espeyó como los momentos estelares de la mesma tan venceyaos d’una u otra manera a esti llugar y a la so simboloxía.

Nuna Cuadonga mítica ya de por sí, vampirizada pol catolicismu, y dende la batalla anicial asocédense’n Cuadonga una riestra de momentos hestóricos dende la asignación del primer Princeps, Pelayo, y la creación del Regnum Asturorum dica’l manifiestu de Setiembre del 2013 denunciando la situación nacional asturiana y la visita de los reis d’España nel 2.018.

Con una impresionante profusión de datos hestóricos Mariano Suarez debuxó el camín del Regnum Asturorum y los munchos intentos d’apropiación del llugar ya’l mitu de Cuadonga por parte de la mui posterior monarquía española, incluyendo nellos a Franco, al que definió como “un Borbón más, llendoyos el práu demientres cuarenta años y devolvióyoslu segáu”.

Na so esposición espeyóse nidiamente l’ancestral enfrentamientu pente la identidá asturiana y la dominación de la monarquía española, qu’estos intenten revindicar reiteradamente con sucesives humildaciones y amueses de fuercia

Pa finar la so intervención denunció el descomanáu gastu, de más d’un millón d’euros, que la visita de mañana va costar a los asturianos, asina como’l falsiamientu de datos colos qu’intenten dar una imaxen irreal de la reación de los asturianos con estos actos.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies