El Parees Fest defínese como un “Festival d’intervención mural”nel que s’involucra a la ciudadanía y artistes pa ufrir a la ciudá d’Uviéu una nueva mirada al traviés de les sos parees. Esti añu cuenten con pintar ocho medianeres, cola collaboración de dellos artistes y coleutivos, desendolcando amás de manera paralela abondos talleres y actividaes
La primer muria, allugada na Cai Amparo Pedregal (El Milán) ta a piques de ser rematada polos artistes uruguayos del Coleutivu Licuado. Nella ríndese homenaxe a la Muyer Asturiana al traviés del retratu en gran formatu del grupu de pandereteres Nun Tamos Toes, espeyando la so llucha feminista y les sos esperances.
Pa decidir el tema de cada muria el Parees Fest fae alcuentros previos con estremaos coleutivos, buscando les idegues más representatives del barriu onde s’allugará y nesti casu aconceyaron coles impulsores del proyeutu ‘Folk Queer’ y con otros grupos mozos que promueven revisiones del folclor asemeyaes.
El siguiente mural vien de ser entamáu y pintaráse nes parees del Casinu de la Riera, tando dedicáu al centenariu del Casino de Trubia, con una obra del artista Roc BlackBlock. Les actividaes del Parees Festival continuarán tol mes de Setiembre y finarán con una intervención na Nueche Blanca d’Uviéu, el 6 d’Ochobre.
Llucía F. Marqués
This work is licensed under a Creative Commons Attribution 4.0 International License.
