El Martes cuatro de Setiembre a les 18:30, na Antigua Escuela de Comerciu de Xixón y dientro les actividaes venceyaes al I Simposiu Iberoamericanu d’Adsorción va cellebrase una mesa reonda na que se van tratar los retos a los que les muyeres científiques enfrenten nos sos oficios
Entá esisten numberoses torgues na carrera profesional de les científiques, anque la situación deseméyase enforma d’unos países a otros. Esta mesa redonda va cuntar con representantes institucionales del CSIC y l’Universidá d’Uviéu, d’investigadores n’activu n’Europa ya Iberoamérica (en distintos estadios de la so carrera científica) y de representantes d’organizaciones internacionales que trabayen pa que les científiques tengan la visibilidá que se merecen y pa fomentar les vocaciones ente les xeneraciones más nueves.
Confirmaron la so presencia, ente otres personalidaes, la Dra. Elena Domínguez, vicepresidenta de Rellaiciones Internacionales del CSIC, SAR Princesa Dra. Nisreen El-Hashemite, impulsora de la declaración de la ONU del Díi Internacional de la Muyer y la Neña na Ciencia (11 de febreru) y Direutora Executiva de la Royal Academy of Science International Trust (RASIT), la Dra. Elena Marañón Maison, direutora Xeneral de Prevención y Control Ambiental del Gobiernu del “Principado” la Dra. Isabel Ruiz de la Peña González, direutora de la Estaya d’Espardimientu y Promoción de la Investigación de la Universidá d’Uviéu, la Profesora Diana Azevedo, Universidá Federal do Ceará, Brasil y la Profesora Pegie Cool de la Universidá d’Amberes, Bélxica.
Tamién va cuntar cola participación de numberosos asistentes a la Xunta Ibérica de Adsorción, procedentes de 15 países estremaos. La mesa reonda va tar moderada pola Profesora Conchi Ania, presidenta del comité organizador del congresu y Direutora d’Investigación del CNRS (Francia) ya investigadora del Institutu Nacional del Carbón (INCAR-CSIC, Uviéu) y la Dra. Teresa Valdés-Solís, secretaria téunica del congresu ya investigadora del INCAR-CSIC.
Esta actividá ye abierta al públicu, y va cuntar con sistema de torna simultáneo.
Redaición InfoAsturies
This work is licensed under a Creative Commons Attribution 4.0 International License.
