• Portada
  • >
  • Conceyos
  • >
  • III Alcuentru de Bandes de Gaites y II Concursu de Baille’l País en Barros

III Alcuentru de Bandes de Gaites y II Concursu de Baille’l País en Barros

  • 25 Agosto, 2018

Dientro les fiestes de Barros (Llangréu) la banda gaites Conceyu Llangréu entama’l III Alcuentru de bandes de gaites. El domingu 26 d’agostu de magar les 13h, la música’l país sedrá la protagonista en Barros, cola participación de cuatro bandes de gaites

En primer llugar, sentiremos a los Escolinos de Llangréu, les nueves xeneraciones de la escuela de música tradicional de la banda gaites Conceyu Llangréu, qu’aseguren la continuidá de la tradición. Pesi a la so mocedá, estos rapazos y rapaces lleven tres años participando en festivales solidarios ya intercambios culturales con otres formaciones, llevando’l so bon facer a Portugal, Galicia y tamién a la TPA, nel programa Cantadera; nun falten nel homenaxe a Palacio Valdés que tolos años entama’l conceyu Llaviana nel pueblu d’Entrialgo y participaron nel espectáculu “Hai una llinia trazada” qu’entamare en marzu la Banda Gaites Conceyu Llangréu.

La segunda sedrá la «Banda de gaitas Teixo – Manolo Quirós», ñacía nel añu 1996 por iniciativa del entós alcalde del conceyu quirosanu, Agustín Farpón y del maestru gaiteru, tristemente fináu, Manolo Quirós.
Formada principalmente por mozos del Conceyu Quirós, participó a lo llargo d’estos veintidós años en festivales y muestres folclóriques en dellos puntos del país, asina como fuera del territoriu nacional, en países como Francia, España o Cuba.
Cunten con un ampliu repertoriu que va dende la música tradicional asturiana a composiciones propies, nes qu’ellos mesmos nun dulden n’acompañase con otros instrumentos modernos como puen ser l’acurdión, el saxofón o los teclaos, siguiendo l’exemplu del que fore’l so fundador, Manolo Quirós, conocíu por amiestar la gaita asturiana con otros instrumentos más allá del tambor.
Anguaño la «Banda de gaitas Teixo – Manolo Quirós» ta formada por quince músicos, toos ellos escolinos de la «Escuela de Música Tradicional Teixo – Manolo Quirós», na qu’imparten les sos enseñances los maestros Alberto Varillas y Gustavo Eguren.
Ente los llogros más importantes, ta’l videuclip “Celtas Cortos en Quirós” del añu 2012 col qu’algamaron que’l grupu «Celtas Cortos» pesllara la so xira en Quirós, el Premiu ATR (Asociación de Telespectadores y Radioyentes) al meyor videuclip del añu 2014 y el Premiu AMAS (Anuario de la Música Asturiana) a la “Meyor Canción Folk 2017” entitulada “Suaños al Alba”, títulu que tamién lleva’l caberu de los sos trabayos discográficos.

Dende’l Bierzo, la tercer invitada ye la Banda de Gaitas de Vega de Espinareda formada va cuasi diez años por un garrapiellu de persones que naguaben por deprender a tocar un instrumentu tradicional.
Nos sos entamos participó n’actuaciones alredor del so conceyu y pasu ente pasu cellebrando conciertos na comarca del Bierzo; amás de facer alcuentros con otres bandes.
Nel añu 2016 la banda fizo’l so conciertu más importante nel 25 Aniversariu de la Banda amiga Castro Bergidum nel Teatru Bergidum de Ponferrada. Amás, nel mesmu añu viaxaron a Pontecaldelas (Pontevedra) pa participar na Fiesta Gastronómica del Emigrante.
Nel añu 2017 entamaron el so primer festival de Bandes de Gaites xunto a delles bandes amigues ente les que s’alcuentra la Banda Gaites Conceyu Llangréu.

Y finalmente la propia Banda Gaites Conceyu Llangréu, que vien d’algamar la so mayoría d’edá y na que toquen cerca de venti persones, pente gaiteros, bomberu, caxistes y timbaleros.

Nos sos 18 años d’hestoria esta banda, que s’inaguró nel Alcuentru de bandes de gaites de Santiago (Sama) del añu 2.000, pasó por abondos festivales, como l’Intercélticu d’Avilés, el de Guingamp (Bretaña) o el de la gaita cántabra (Únquera) y partició en dellos Intercambios con bandes de gaites dientro y fuera d’Asturies, actuando en delles ocasionoes fuera’l país con motivu del Díi d’Asturies, anantes d’entamar va tres años los sos propios Alcuentros.

El llunes 27 d’agostu la folixa continua a les 11:30 col II Concursu de baille a lo suelto “Pozaricando”, con dos categoríes estremaes: profesionales y aficionaos. La xente que quiera ensayar pal concursu, el domingu a les 18:30 podrá participar nun tallerín de baille de baldre nel parque Barros.

Nuria Prendes

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies