N’Asturies hai pocu más d’un trabayaor por pensionista, un datu tarrecible por qu’implica dos de les mayores llaceries que carecemos nel país: l’avieyamientu progresivu de la población y la falta d’emplegu. Lo que nun tendría por qu’implicar -y esi ye’l miéu que se ta vendiendo a la población- ye que nun haiga perres pa pagar les pensiones

L’alarmismu xeneralizáu sobre la falta perres pa les xubilaciones, qu’a tanta xente emburria a buscar planes privaos, y la culpabilización de la “crisis” y la falta d’emplegu pa desplicar esta escasez de fondos básase nuna falacia interesada: que les perres coles que pagar les pensiones d’una xeneración tienen de proceder  esclusivamente de les cotizaciones de les vinientes.

Los agora xubilaos asturianos pagaron (quisieren o non) en so díe les cotizaciones correspondientes, aportando bones cantidaes de dineru a la “caxa común” española. El deficiente sistema de “repartu y caxa única” col que furrula l’estáu español y la so desastrosa xestión permite qu’eses perres nun ten agora ehí disponibles pa pagar lo que yos correspuende.

Treslladando la idega a un plan priváu, lo que se ta diciendo aseméyase a que, depués de pasar cincuenta años pagando la correspondiente cuota, al cliente se-y dixera que’l cobru pelligra por falta de nuevos clientes; como si la caxa de pensiones del estáu fore una especie de fraude piramidal nel que a falta de nueos pagadores esbarrumba’l montaxe.

Per otru lláu, espárdese la sensación de qu’Asturies “depende” d’otres fasteres del estáu pa facer frente a los pagos, escaeciendo que si falten les perres qu’apurrieron los agora xubilaos ye precisamente porque esos fondos foron utilizaos pa otros fines y otros llugares. Los pensionistes asturianos nun piden caridá: reclamen el drechu a recibir lo que ya pagaron.

L’envís d’esta culpabilización ye triple: per un lláu, crease la idega de que la ruindá de les pensiones ye inevitable, daqué que deriva esclusivamente de la coxuntura actual, llevando a la resignación y torgando la protesta; per otru, afálase a la privatización de les pensiones, finxu final d’esta política de miéu y retayos. Ensin escaecer que de pasu afitamos la idega d’una dependencia ficticia del estáu español, tapeciendo el previu marafundiu que’l mesmu fizo de les perres de los trabayaores asturianos.

Tou esto nun amenorga la gravedá del fechu de que Asturies tea tornándose nun inmensu xeriátricu ensin los medios económicos nin mélicos pa facer frente les necesidaes d’un coleutivu que va camín de les 300.000 persones, más d’una cuarta parte de la población.

Llucía F. Marqués

This work is licensed under a Creative Commons Attribution 4.0 International License.