• Portada
  • >
  • Mundiu
  • >
  • La minería europea va crear 30 millones d’emplegos

La minería europea va crear 30 millones d’emplegos

  • 15 Agostu, 2018

De manera cuasi simultanea col fin de la minería n’Asturies, la Comisión Europea decide apostar poles esplotaciones mineres como mediu p’asegurar l’autosuficiencia europea, al tiempu que se rebaxe’l paru xuvenil
Lloñe queda la política d’abandonar la estracción de minerales por razones de sobrecostu y/o problemes medioambientales: la Comisión Europea propónse reabrir xacimientos escaecíos d’estremaos minerales y buscar otros nuevos pa potenciar la reindustrialización del continente.

La XE tien un déficit d’un millón d’emplegos téunicos cualificaos que tán venceyaos a la minería y hai qu’atopa-yos ocupación. Asina, en términos de rentabilidá social, ye como se plantega la reapertura de la minería n’Europa.
Otru argumentu de pesu ye dexar atrás la dependencia d’otros países a la de consiguir minerales. El Plan Direutor de la XE pa les materies primes tien l’envís de que tolos socios puedan tener un acesu seguru a les mesmes, daqué que l’actual coxuntura, colos principales países productores controlando’l mercáu de materiales comu’l cobre, el wolframiu, el carbón, l’uraniu y otros minerales, nun ye garantizable nun futuru.
Pa la Comisión Europea, el desendolcu económicu pasa pola industria y p’apostar por esti seutor ye imprescindible producir materies primes. Poro, dientro del programa Horizonte 2020, que dota con 80.000 millones d’euros la reserva pa industrialización del continente, resérvase una partida importante a proyeutos ya investigaciones venceyaes a les materies primes.
El retu consiste n’algamar un 20% de PIB industrial en dos años, de manera que les economíes de los 27 seyan más sólides, creando coles mesmes fasta 30 millones d’emplegos venceyaos a esti seutor pa esa fecha.
Pa ello, la inversión en nueves teunoloxíes y formación ye primordial, una y bones Europa yá nun concibe que dengún tipu d’industria seya puerca o irrespetuosa col mediu ambiente nin ta dispuesta a consentir l’amenorgamientu en costos basáu nel empeoramientu de les condiciones llaborales.
Mentantu, n’Asturies, destrúyese’l texíu industrial y présllense les mines p’apostar de manera cuasi esclusiva pol turismu de mases, el seutor económicu más vulnerable y el que mayor precariedá llaboral ufre.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

This site uses Akismet to reduce spam. Learn how your comment data is processed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies