41.600 persones colaron d’Asturies na pasada década; cuasi otres tantes tendrán qu’escoyer pente facer lo mesmo o continuar subsistiendo ensin malpenes ingresos
Hai noticies que se lleen meyor xuntes. Lleíemos va pocu que más de 4.000 mozos y moces al añu abandonen el país y pente chancies y veres siento dicir aquello tan guapo de “¿quién va a querer irse de este paraiso?”. Nin que dicir tien que quien lo dicía sentaba delantre d’un bon cachopu en chigre y que lu regaba con bona sidre, aprofitando al másimu d’unes vacaciones lloñe del calor de la so España natal.
Ayeri salió na prensa la segunda parte: otros 41.000 asturianos tan en paru ya ensin cobrar prestación; El 40% d’ente ellos lleven dellos años ensin trabayar, pesi a buscar emplegu “de forma activa”. La mayoría, muyeres, munches con fios a cargu, xunto con mayores de 50 años o mozos con perbona formación, pero ensin experiencia nin posibilidá d’algamala. Nun hai falta dir mui allá pa decatase de qu’una bona parte d’ellos colarán del país a la gueta d’un futuru.
Ya puestos, tamién podemos cruzar estes dos noticies con otres dos recientes nes que se dan datos aparentemente contrarios: n’Asturies baxó’l paru, si, pero tamién la ocupación ¿Cómo puede haber menos trabayaores y tamién menos paraos? Fácil, hai menos xente n’edá de trabayar. 2.274 paraos menos nun añu nel que, de media, colaron 4.000 persones a buscar trabayu fuera. 65.000 trabayaores menos na mesma década que 41.500 asturianos dexaron el país; otros cuantos xubiláronse.
Llucía F. Marqués
This work is licensed under a Creative Commons Attribution 4.0 International License.
