Asturies ye antitaurina

  • 10 Agostu, 2018

Un manifestamientu percorrerá les cais de Xixón esti domingu 12 d’Agostu en refuga a la Feria Taurina de Begoña. Entantu, sigui abierta la recoyía de robles escontra les clases de toréu pa la reciella

El movimientu antitaurín n’Asturies remóntase a la Illustración ya’l propiu Xovellanos, llegando a movilizar ya en 1914 a miles de persones no que yera la Sociedá  Antiflamenquista Cultural y Protectora d’Animales y Plantes en Xixón.

Tres de la refuga de l’aniciativa presentada por Andecha Astur nel añu 2003 pa conseguir que la Xunta Xeneral prohibiere les corrides en toa Asturies y la negativa del Conceyu Xixón nel 2017 -gracies a l’astención d’IU- de convocar una consulta pa prohibiles, como plantegaba Xixón Si Puede, nesti intre l’únicu conceyu declaráu abiertamente comu antitaurín ye’l de Castrillón.  Sicasí, la presión nes cais ye continua ente cualisquier eventu taurín, consiguiendo facer desapaecer festexos tan ayenos a la tradición asturiana comu la “corrida marinera” de Candás.

La declaración de ruina de la Plaza toros de Buenavista, n’Uviéu, nel añu 2008 reduxo les feries asturianes a la de Begoña, en Xixón, tando Asturies nos primeros puestos dientro l’estáu por ser de les que menos corríes cellebra. Cada añu miles d’asturianos manifiéstense peles cais de Xixón reclamando la fin d’esta cabera feria. Esti añu la cita ye’l díe doce a les 16:30 na Plazuela San Miguel en Xixón.

Arturu Bermeyu, secretariu xeneral d’A.A –una de les organizaciones polítiques que sofiten la concentración- llanzó la so acusación al Conceyu de Xixón, yá que dáu l’escasu sofitu popular esta feria non podría celebrase de nun recibir añalmente cuantioses aportaciones de l’alministración pública. “El sofitu incondicional del gobiernu llocal a estos festexos, tan ayenos a la cultura asturiana como crueles, amuesen hasta que puntu tán desconectaos del pueblu al que dicen representar” .

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

This site uses Akismet to reduce spam. Learn how your comment data is processed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies