Los datos oficiales, recoyíos poles estaciones midiores oficiales, presenten picos espectaculares nos niveles de partícules y bencenu
Sama ye la población que llidera los datos negativos reiteradamente, presentando dellos picos de más de doscientos µg/m3 de Pm10, cuando la OMS recomienda unos valores llende pa partícules de 20 µg/m3 de medía añal y un valor d’alerta con una media diaria de 50 µg/m3 para estes partícules de más de 10 mm. Llangréu va na tiesta tamién en nivel de contaminación por micropartícules Pm2,5 de toa Asturies.
En Xixón, en plena temporada turística a la contaminación fecal de les agües súmase l’atmosférica. Son cinco les estaciones que superen d’avezu’l nivel d’alerta diariu pola presencia de Pm10: Cimavilla, Tremañes, Jove, Roces y el Lloredal, con picos de fasta 137 µg/m3.
N’Uviéu el principal problema torna a ser el bencenu, que superó ampliamente el triple del umbral de seguridá pa la proteición de la salú humana, con valores de 18 µg/m3, acordies a los datos de la estación oficial de Trubia; los efeutos llegaron a midise na allonxada estación de Ventanielles, a 14 Km, onde s’algamaron picos de 6 µg/m3
Uviéu sigui siendo’l llugar más contamináu por bencenu de la Península Ibérica, sabiéndose que pente les consecuencies d’esti contaminante a llargu plazu tan delles enfermedaes graves -cancer, anemia…- y efeutos agudos na salú a llargu plazu.
Amás del Bencenu, las Caldas recoyió ayer tamién una altísima media de Pm10, algamando los 64 µg/m3 en 24 hores.
Los picos de contaminación atmosférica disparen los ingresos hospitalarios n’Asturies por enfermedaes respiratories acordies a un estudiu epidemiolóxicu desendolcáu pola Conseyería de Sanidá y presentáu nel añu 2016.
Redaición InfoAsturies
This work is licensed under a Creative Commons Attribution 4.0 International License.
