Asturies tendrá esti añu un incrementu real na financiación de namás el 1,48%, entantu n’España la media de xorrecimientu de la financiación autonómica ronda’l 4%

Asturies ingresará en 2019 del sistema de financiación autonómica malpenes 2.762 millones d’euros, una subida respeuto l’añu pasáu d’un 1’48% , mui perbaxo de lo que sube n’otres partes del estáu y mui perbaxo incluso de la subida del IPC, qu’a estes feches ya ye del 2’2%

El  mecanismu de repartu torna dexar a Asturies nun nivel d’ascensu interanual allonxáu de la media y a la cola de les que menos recursos reciben del estáu, con namás qu’Aragón, Cantabria y Estremadura per detrás. Una vegada más los más beneficiaos son Madrid, Catalunya y les Islles Canaries, que medra más d’un 6%.

La emportancia d’estos ingresos ye muncha, una y bones l’ochenta por cientu de los presupuestos pal furrulamientu de l’alministración pública vien de les perres que se reparten al traviés de la financiación autonómica.

Nuria Prendes