Hai diez trabayaores n’edá cercana a la xubilación por cada emplegáu de menos de 25 años. Na mayoría de los casos una xubilación implica la desapaición del puestu de trabayu: daqué falla nel relevu xeneracional nel mercáu llaboral asturianu

Asturies llidera les cifres de población llaboral envieyecío, cola metá de los trabayaores n’activu mayores de 45 años, al mesmu tiempu que preslla la llista n’emplegu xuvenil, con namás el 2% de los ocupaos menores de 24. Les sucesives “reconversiones”, el fin de la minería, el desaniciu del texíu agrícola ya industrial y la fuerte dependencia del emplegu públicu, que supera l’ochenta por cientu n’Asturies, debuxen un mercáu llaboral en decadencia nel que los puestos de trabayu nun pasen a la viniente xeneración, sinón que se pierden dafechu.

La mocedá asturiana tien poques perspeutives a curtiu plazu: la tasa de paru pente los menores de 25 años asciende al 44’6%, superando’l 48% pente muyeres. Na franxa d’edá menores de 20 años llama l’atención la cifra de paru femenín: 100% reondu, frente’l 72% total. Remembremos qu’estos porcentaxes danse sobre una población moza ya mui amenorgada pola emigración.

El fenómenu ye especialmente alarmante nel seutor agrariu, onde’l porcentaxe de trabayaores de más de 50 años supera l’ochenta por cientu. El desdexamientu de les fasteres rurales ya’l pocu sofitu a les actividaes ganaderes y agrícoles dificulta descomanadamente el relevu xeneracional nestos seutores, nel so momentu pegoyos de la economía asturiana y nos que ya namás trabaya un 4% de la población.

A lo ruino del mercáu llaboral xuvenil súmase la precariedá de los emplegos a los que la mocedá acede. El 74% d’ellos pertenecen al seutor servicios, cientrándose especialmente na hostelería, onde les condiciones llaborales son les más dures. El 90% de les muyeres asturianes dependen económicamente d’esti seutor.

Llucía F. Marqués

This work is licensed under a Creative Commons Attribution 4.0 International License.