N’Asturies piérdense miles de puestos de trabayu respeutu al añu pasáu, entanto nel estáu español sube ablucantemente l’indiz d’ocupación llaboral, algamando cifres que nun se víen dende va una década

Los datos de la EPA d’esti trimestre saltaron a tolos medios de comunicación como una escelente noticia, nel estáu español incorporáronse al mercáu llaboral cerca del mediu millón de presones. Sicasí, n’Asturies los mesmos datos ufren cifres llacerioses, que indiquen non solo una fuerte cayía del mercáu llaboral sinón una tendencia a dixebrase del tan cacarexáu procesu de “recuperación” económica que vive, según los datos, l’estáu español.

P’Andecha Astur “Estes son les consecuencies de la política española pa con Asturies y del procesu de desmantelamientu sistemáticu de los seutores productivos asturianos: ganadería, pesca, agricultura, minería, naval y agora les térmiques”

De los 4.014.000 asturianos que teníen trabayu nel segundu trimestre del 2017, namás 394.700 tan ocupaos agora, una tendencia a la baxa que ya se dió el primer trimestre l’añu, con una cayía de 6.200 respeutu al añu pasáu. D’ellos, les más afeutaes son les muyeres, ya que la ocupación femenina cayó un 2’6%, lo que se traduz nun total de 4.900 puestos perdíos.

Son datos apurríos ayeri pol SADEI de magar la Encuesta de Población Activa (EPA), una investigación continua y de periodicidá trimestral que vien recoyendo de magar 1964 los datos de la población en relación con el mercáu de trabayu: ocupaos, activos, paraos ya inactivos.

Redaición InfoAsturies

This work is licensed under a Creative Commons Attribution 4.0 International License.