El 1.300 Aniversariu del ñacimientu del Reinu d’Asturies pasa cuasique desapercibíu. Esceptuando pola emisión d’una moneda polémica en forma y mensaxe

La nueva moneda pa colecionistes  emitía “pa facer alcordanza del ñacimientu del Reinu d’Asturies” vien cruciada pola bandera d’España, un mensaxe del sometimientu d’un reinu de 1.300 años a otru de pocu más de 500.

Nel frente, l’escudu adoutau pol “Principado” en 1984, heriederu del aprebáu pola diputación d’Uviéu nel 1857, que diz nel so llema “Hoc signo tuetur pius – Hoc signo vincitur inimicus” (Con esti emblema deféndese al piadosu – Con esti emblema véncese al enemigu), sensiblemente desemeyáu del llema de la primer bandera d’Asturies, propuesta por Xovellanos en 1808, coles pallabres “Asturies xamás vencida”. Una bandera, por cierto, anterior nel tiempu a la española.  Pel otru lláu la efixe de los reis. Los d’Asturies? Non, los d’España.

El valor de la moneda, trenta euros, tampocu nun ye casual: correspuéndese a la riestra de monedes emitíes pa remembrar feches emportantes pal reinu d’España, comu l’enllaz de Felipe y Leticia, l’aniversariu de la entrada na Xunión Europea, el de la primer edición del Cervantes o el mesmu cabudañu del so rei. Con ello faen por fagocitar la hestoria del Reinu d’Asturies dientro de la del d’España, ampliando la so curtia hestoria en cuasi ochocientos años.

Pa finar, nin siquiera’l mesmu nome del Reinu se respeta, camudando la toponimia. Un conxuntu de detalles con mensaxe de la corona d’España a los asturianos.

Llucía F. Marqués

This work is licensed under a Creative Commons Attribution 4.0 International License.