• Portada
  • >
  • Opinión
  • >
  • Aviones de guerra tornen al cielu asturianu nel aniversariu’l bombardéu de Xixón

Aviones de guerra tornen al cielu asturianu nel aniversariu’l bombardéu de Xixón

  • 22 Xunetu, 2018

Güei fai xusto 81 años los xixoneses miraben al cielu y veíen aviones

Aviones de guerra debuxaben esteles de fumo atronando perriba la sablera y les neñes de Xixón asomaben a la ventana a escucalos cola boca abierta, segundos anantes de qu’una ma asustada les tornara pa dientro tirando de les coletes –asina me lo cuntaba una superviviente-

L’ataque del 22 de xunetu dexó cuatro muertos y una firía. Tres de los finaos yeren socios del Atenéu de La Calzada. Yera namás l’entamu.

15 meses de bombardeos por mar y aire, dirixíos pol exércitu español, que los neños d’Asturies nun estudien nos llibros de testu (escaecer que fuimos víctimes faenos candidatos de tornar a selo) 500 díes cayendo bombes enriba  la ciudá, miles de muertos, civiles, vecinos, escaecíos.

Los hermanos d’esos aviones, baxo la mesma bandera, tripulaos pol mesmu exércitu, xestando en so vientre les mesmes bombes, remanaos pol mesmu idegariu, sedrán aplaudíos mañana por cientos, miles de xixoneses estelaos, inconscientes  de la menacia qu’impliquen, del mensaxe en cielu que mos recuerda, a glayíos que francen –lliteralmente- la barrera’l soníu, que meyor nun tornemos a llevantar el puñu nin la cabeza, qu’ehí tarán ellos curiando de que tou siga igual.

Esos mesmos aviones, baxo la mesma bandera, tripulaos pol mesmu exércitu, xestando en so vientre les mesmes bombes, remanaos pol mesmu idegariu, bombardien anguañu poblaciones, xenerando nuees traxedies.

Ante’l surrealismu hestóricu ya’l despreciu qu’implica’l querer facer ver guapura na maquinaria de muerte, igual queda fuera llugar comentar que demientres estos aparatos atronarán ensin llende, en Xixón nun se pue tocar la gaita porque fae ruiu y nel Carmín  quitóse la traca pa nun asustar a los perros…

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies