L’actividá que se quier llegalizar considérase  potencialmente contaminadora de l’atmósfera, xenerando amás ruidos, vibraciones y abondosa povisa, nociva pa la salú

La cantera, na que según la CEA ta trabayandose ensin les autorizaciones pertinentes, trátase d’un complexu industrial, onde amás de la cantera hai delles istalaciones complementaries; a la industria estrautiva, ya llegalizada, amiestase l’almacén de finos (povises de la térmica), la Planta de Morteru secu y la Planta de Formigón que ye la qu’agora se quier llegalizar.

Esta cantera, conocida comu Peñón de Valverde, y les sos istalaciones ausiliares, acumulen abondes denuncies de los vecinos de Somines y Nalió polos importante impautos que tuvieron de soportar durante’l so llaboreu na dómina en que yera titular Catisa, del Grupu Martínez Núñez, que foi investigáu por estremaos delitos nos que tan involucraes delles  alministraciones por collaborar col so silenciu y complicidá coles irregularidaes cometies pol grupu escontra’l mediu ambiente ya’l padrimoniu, pendientes de resolvese.

Pa la Coordinadora Ecoloxista d’Asturies abulta estraño que “tando la mayoría de les plantes de formigón  esistentes regulaes pola escasez de trabayu, se planteguen recuperar les paralizaes como esta” másime teniendo’n cuenta la situación de paralización que vive’l seutor de la costrución anguañu.

Redaición InfoAsturies

This work is licensed under a Creative Commons Attribution 4.0 International License.