El guarda sedrá xulgáu de “falta grave” por denunciar publicamente presuntes irregularidaes na xestión de los daños de llobu

Xurde Gayol enfréntase a un problema disciplinariu que puede finar cola so suspensión llaboral o col so treslláu, por denunciar abiertamente la mala xestión del llobu n’Asturies. Un vidíu espublizáu n’internet foi el mediu escoyíu pol guarda pa facer público una situación que yera conocía dientro’l so ámbetu: les males práutiques de dellos ganaeros cazaores y guardes que faen negociu col pagu de daños de los animales selvaxes, ante’l silenciu l’alministración.

Xurde Gayol aseguró nes sos declaraciones que “munchos ganaeros compren potros baratos, tráenlos y suéltenlos con cuatro o cinco meses nes sierres ensin la so ma o’l machu que defiende la manada. El llobu ehí cébase, pero el negociu ye reondu. Compran los potros por 50 euros y equí puen algamar los 300″. Les sos pallabres sentaron permal tanto nel ámbetu ganaeru comu n’alministración, a los que acusaba de complicidá.

Seique la denuncia tuvo llugar fuera l’horariu llaboral y nun s’investigaron los graves fechos ellí asoleyaos, ye contra Xurde contra quien s’abrió espediente disciplinariu y ye elli quien ve menaciáu’l so puestu de trabayu, por “atentáu grave na dignidá los funcionarios o l’alministración” y una “falta grave de consideración”, delitos que puen acarretar sanciones de fasta tres años de suspensión nes sos funciones, penalizaciones espedientaries o’l so treslláu definitivu.

El sábadu 21 a les siete la tardi ta convocáu un actu en defensa de Xurde Gayol, en “La Casa Azul”, de Navia, na que amás de pidir que se retiren los cargos por albidralos desproporcionaos reclamaráse’l drechu a poder denunciar pública y llibremente los casos de fraude, como garantía de la llibertá d’espresión y mediu de control d’actividaes ilícites.

Nuria Prendes

This work is licensed under a Creative Commons Attribution 4.0 International License.