Nun plazu averáu de tres años Carreño camudará toles sos lluces por otres de muncho menor consumu enerxéticu

La carreñense Candás foi la llocalidá escoyía pol IDAE, Istitutu pola Diversificación y Aforru Enerxéticu -organismu ascritu al Ministeriu de Transición Enerxética-  pa formar parte d’un proyeutu de sostitución de los 1.819 puntos de lluz que conformen la so illuminación por otres tantes lluminaries LED, comu forma d’amenorgar el consumu enerxéticu y facilitar el pasu a una economía baxa en carbono. Con esta intervención espérase algamar un aforru d’enerxía del 77%.

La sostitución, que supondrá una inversión total d’alrodiu d’un millón, dirá faciéndose a lo llargo de 30 meses y cuntará con una sovención del Fondu Comunitariu FEDER que cubrirá el 80% del so coste. Los cuasi doscientos mil euros que formen el 20% restante sedrán apurrios pol Conceyu de Carreño, que podrá financialos comu Inversión Caltenible.

Llucía F. Marqués

This work is licensed under a Creative Commons Attribution 4.0 International License.