L’asociación cultural española “Hispania Nostra” vien d’espublizar un catálogu padrimonial nel que  se recueyen dellos monumentos asturianos a piques del desaniciu. La llarga llista da una idega del abandonu y la desidia que carecen estos testigos de la hestoria’l nuesu país

Dientro la llarga riestra d’edificios hestóricos abandonaos incluyíos comu d’altu riesgu de desaniciu nel catálogu padrimonial presentáu pol comité científicu de la reconocía istitución “Hispania Nostra” apaecen monumentos como la Torre de Soto, n’Al.ler, los monasterios de San Antolín de Bedón, en Llanes, San Salvador de Curniana y el de Santa María la Real d’Obona, en Tinéu, la casa los Bernaldo de Quirós, en Candás, el Palaciu de Faes, en L.lena o la ilesia de San Cipriano, en L’Infiestu, y la de San pedro de Plecín, en Peñamellera Alta.

N’especial situación de desaniciu alcuéntrase’l palaciu los Faes de Miranda, en Carabanzo (L.lena), un turruxón costruyíu nel sieclu XVII, abandonáu de magar el 34 y que precisa una intervención urxente, valorada n’alrodiu de 1’2 millones d’euros, si nun se quier que desapaeza definitivamente nos años vinientes.

La desapaición d’estos monumentos nun implica namás una perda arquiteutónica y artística d’enorme trescendencia, sinon que con ellos piérdese la posibilidá d’afondar na hestoria d’Asturies y de caltenela en pie pa xeneraciones venideres.

Llucía F. Marqués