Dientru’l Programa Añal d’Actividaes de la Lliga Celta d’Asturies, el 21 de xunetu, entámase una visita grupal al castru Chao Samartín, recientemente menaciáu por un programa de restauración que pon en pelligru importantes ellementos del mesmu, comu la mesma Lliga denunció
El Chao Samartín ye un de los castros del país que tien rexistros más antiguos, asitiándose los primeros pobladores del castru alrodiu de la Edá de Bronce tardíu, alredor del 800 a.C. y finando l’asentamientu nel sieclu II D.C. por mor d’un terremotu. La so llarga ocupación xustifica la presencia d’importantes nicios arqueolóxicos nel mesmu, seique bona parte ta por escavar, en concreto un xacimientu de la Edá del Bronce y otru de la Edá del Fierro que, sigún Fernán Morán, presidente de la Lliga Celta, apurriríen información d’incalculable valor para afondar na conocencia de la nuesa hestoria y la nuesa cultura.
L’arqueólogu D. Angel B. Villa Valdés, del Muséu Arqueolóxicu d’Asturies, qu’amás foi’l Director del Parque Arqueolóxicu del Navia – Eo y partícipe d’escavaciones nel castru Chao Samartín, sedrá l’encargáu de desplicar a los asistentes los finxos más interesantes del so orixe, población, cadarma, afayos arqueolóxicos atopaos nes escavaciones, etc.
Darréu tendrá llugar la visita’l muséu y l’actu finará cola llectura d’un manifiestu sobro’l patrimoñu hestóricu – cultural d’Asturies por Fernán Morán, Presidente de la Lliga Celta d’Asturies.
Seique ye vezu de la Lliga Celta d’Asturies facer les sos actividaes de baldre, nesti casu sedrá preciso el pagu de la entrada al muséu, qu’oscila pente los 1’50 € pa la reciella y los 4 € pa los adultos.
Llucía F. Marqués
This work is licensed under a Creative Commons Attribution 4.0 International License.
