Un añu más Asturies carez les consecuencies de la masificación turística al tiempu que nun algama’l beneficiu económicu esperáu
El caberu informe d’ Exceltur, la patronal del seutor turísticu espeya una fuerte cayida de la rentabilidá turística nes principales ciudaes asturianes.
Acordies esti informe, realizáu a partir de los datos del istitutu Nacional d’Estadística (INE) y los que faciliten los mesmos empresarios, n’Uviéu la perda d’ingresos foi d’un quince por cientu, siendo la postrer na llista de capitales del estáu tocantes a aprofitamientu económicu del turismu. Xixón, magar tener una ocupación del 86% (un bon nivel, pesi a ser inferior al d’otros años na mesma fecha) carez tamién un descensu de la so rentabilidá turística, que cayó un 0,1% nel primer cuatrimestre.
La diferencia ente la rentabilidá media nos destinos urbanos estatales, que s’asitia en 58,1 euros d’ingresu por habitación disponible, y los 23,4 en Xixón o los menos de 22 n’Uviéu, pon n’evidencia les estratexes turístiques del “Principado” , que prioricen cantidá sobro calidá.
El clima nun xustifica esti enclín a la baxa, yá qu’al tiempu que la rentabilidá cayía en Asturies, xubía ablucantemente’n Santander, Coruña o Bilbao, ente los puestos más altos del ranking superando los 50 euros per nueche.
La estacionalidá ya’l turismu de baxa calidá son los principales puntos que, pa los empresarios, xustifiquen esta situación.
Nuria Prendes
This work is licensed under a Creative Commons Attribution 4.0 International License.
