Nun sabemos si se trata d’un trastornu de la personalidá o si en Piloña entá nun s’enteraron d’aú viven; lo que paez nidio ye que la falta d’autoestima emburria a la falta d’apreciu pola identidá propia y al enaltecimientu de lo ayeno

Si va unos meses los amantes de la tradición asturiana echaben fumo cola cellebración de la Feria d’Abril n’Infiestu, agora camudamos de fastera y alcontrámonos colos Sanfermines peles cais de Piloña: surrealismu cultural antroxáu de folixa que, como quien nun quier la cosa, va deliendo lo de nueso pa dar puxu a les, per otru llau perfechamente respetables, cellebraciones d’otros.

El San Fermín piloñés suma ya seis ediciones copiando, medio en serio medio en broma, los populares (y agora mesmo polémicos, tanto pol maltratu animal como polos casos d’abusu sesual) festexos pamplonenses. Misa, procesión de santos chupinazu, pañuelos, menú especial San Fermín, música navarra y parodies de toros corriendo peles cais; 7 díes d’empresllos y por supuestu, canciu final del “Pobre de mi”. Nun se yos escapa nin un detalle que dexe albidrar que tan n’Asturies.

La camaleónica capacidá d’esti conceyu, emperráu n’antroxase d’otros y tresplantase fuera’l país, pa escaecer la propia identidá ye digna d’estudiu sicolóxicu. Entantu y non, los sos moraores nagüen por alcontrar daqué de si mesmos pente los traxes a llunares y los pañuelos colloraos.

Llucía F. Marqués

This work is licensed under a Creative Commons Attribution 4.0 International License.