15 estudiantes bretones escriben los esámenes de matemátiques na so llingua, pesi a la prohibición espresa del rectoráu, que invoca “la Costitución  y la supremacía de la llingua francesa”

Va dellos años que los estudiantes del Istitutu Diwan de Carhaix solliciten que se respete los sos drechos al facer les prebes de matemátiques, ciencies naturales, sociales y económiques del Bac en llingua bretona.

Ya pueden facelo nos exámenes d’hestoria y xeografía, pero non n’otres asignatures, daqué que los estudiantes de Diwan ven falto de xacíu ya una inxusticia comparativa, ya que los vascos si pueden facer los exámenes de matemátiques n’euskera. Depués de quince años cursando los sos estudios en bretón, facer los exámenes en francés abultayos una imposición y un atentáu a los sos drechos llingüísticos.

Pa ello presentaronse a les prebes d’acesu a la universidá y escribieron na so llingua, coscientes del riesgu académicu y personal qu’asumíen y dando un exemplu de concenciación y compromiso pa colos drechos llingüísticos.

Cola fin de sofitar esta valiente aición conviden a toos aquellos que esmolecios pol futuru de la llingua bretona ya en xeneral de les llingües minorizaes a reclamar que se yos corrixan los sos exámenes y que seyan correxíos por bretonfalantes. Pa ello, dende va siete díes, tienen abierta una campaña de recoyía de robles en Change.org que ya cuenta con más de diez mil encontos.

Llucía F. Marqués

This work is licensed under a Creative Commons Attribution 4.0 International License.