Villa confirma que les cúpules sindicales y polítiques aprofitaron el preslle d’Hunosa p’arriquecese

Acaba entamar el xuiciu escontra Villa, dempués d’un patéticu procesu dilatoriu xugando cola so mala salú, y paez que l’es-llider del SOMA nun ta tan mal de la memoria, yá que na so primer comparecencia yá reconoció daqué que yera del dominiu públicu y que perpocos s’atrevieron a denunciar: “Quedeme con dineru d’Hunosa, igual que tolos demás”.

Nun se trata de denguna sospresa, difícilmente hebia dalgún asturianu qu’ignore que tanto les direiciones de los sindicatos mayoritarios como la mafia’l PSOE facien caxa con ca preslle d’un pozu mineru. Villa dixo lo que toos sabíemos y que práuticamente naide nun s’atrevió a denunciar.

De fechu, namás Andecha Astur denunció públicamente estos fechos, yá en 2002 entamó una terria campaña de denuncia, (que careció l’avezáu bloqueú de los medios de comunicación “asturianos”) destapando una rialidá por toos conocía y por toos silenciada, bien porque los beneficiaba direutamente, bien porque nun tuvieron el valor precisu pa llantar cara a esta auténtica mafia que taba destruyendo’l texíu industrial y socio-económicu asturianu a cambiu perres. “Perres y puestinos”, la filosofía de la mafia’l PSOE-SOMA-UGT cola que consiguieron faer d’una Asturies puxante, un país n’onde prima la precariedá, el paru y la emigración.

L’es-secretariu del SOMA; y tamién es-diputáu y es-senaor del PSOE, que nun se mos escaeza, tien muncho que cuntar nesti xuiciu, pero ye difícile que lo faiga, probablemente yá recibiera alvertencies por estes les sos primeres declaraciones, qu’en cualisquier país normal yá sopondríen l’ampliación de les investigaciones (¿quién yeren tolos demás?) y apertura de nueves causes. Ye increyible que presonaxes como Areces tovía nun tean inculpaos o a lo menos investigaos.

MAF

This work is licensed under a Creative Commons Attribution 4.0 International License.