La plataforma denuncia l’incumplimientu del mandatu llegal en munches escueles asturianes no que cinca a la asignatura de llingua asturiana nel segundu ciclu de la Educación Infantil
Tolos informes educativos recomienden falar a los rapacinos na so primer etapa escolar na so llingua materna. Sicasí, la reciella asturiana entra a los tres años nun entornu nel que la so llingua llariega ye, na gran mayoría los casos, inesistente, siendo posible que se yos fale inglés -amás del español- anantes que n’asturianu. En munchos colexos nin siquier se puede optar a que se yos fale na so llingua nel escasu horariu lleutivu concedíu pa l’asignatura de llingua.
La idea de montar la PAEI surde d’un grupu de families, con rapacinos cursando segundu ciclu d’Educación Infantil (3-6 años) n’escueles onde nun s’ufierta l’asignatura d’asturianu. Denuncien qu’hai abondes escueles (les más d’elles) que tán incumpliendo esi mandatu llegal, nun permitiendo exercer un drechu que la Llei d’Usu y promoción del asturianu, vixente n’Asturies dende hai 20 años, reconoz.
Anuncien movilizaciones y conceyos cola Conseyería, centros y sindicatos d’educación pa intentar que nel próximu cursu en toles nuestres escueles SÍ s’ufierte l’asignatura. Animen a contautar con ellos a toles families que ten nel so mesmu casu, ya que la llei ta de parte les families a les que se-yos niega esi drechu.
Llucía F. Marqués
This work is licensed under a Creative Commons Attribution 4.0 International License.
