SUATEA sal en defensa de los interinos asturianos

  • 26 Xunu, 2018

El sindicatu SUATEA vien denunciando nos caberos años la situación xenerada col personal interín en delles alministraciones, especialmente na estaya educativa, onde les tases d’interinidá medraron de forma alarmante nos caberos años. Denuncien qu’esti espoxigue de la interinidá afeuta tantu al profesoráu como’l personal alministrativu y ordenances y forma parte d’una política xeneralizada de l’Alministración

Dende la Unión Europea llamóse l’atención al gobiernu español en delles ocasiones, esistiendo inclusive sentencies xudiciales que falen de contratación fraudulenta, denunciando la esistencia de contratos que s’encadenen, los denomaos pola xurisprudencia como “funcionarios de llarga duración”.

Bona parte d’esti grupu ta formáu por profesionales que, a lo llargo de los años, tuvieron escases o nules posibilidaes d’estabilizar la so situación como personal funcionariu de carrera na midida na que nun esistieron malpenes convocatories d’oposiciones pa ello.

Hai que señalar que la non convocatoria d’oposiciones ye una decisión política que se xustifica de delles maneres, pero esto nun puede esconder que’l personal interín, mientres esti tiempu, vien alquiriendo una amplia profesionalidá, amontando’l so nivel de capacidá y méritu.

N’Asturies atopamos con una Alministración que, en nengún momentu, a lo llargo de los últimos años, manifestó una voluntá d’echar frenu a esta práctica precarizadora del emplegu. Ye por ello que SUATEA decidió presentar un escritu al Alministrativu de cara a empecipiar una negociación cola Conseyería d’Educación. Esti recursu ye’l pasu previu a una demanda xudicial que, esperen, nun aporte a ser necesaria.

Dende SUATEA vienen visibilizando en numberoses ocasiones la situación de los interinos y resaltando los riesgos que significa abrir l’actual procesu d’oposiciones ensin garantizar la estabilidá del profesoráu interín.

De cara al prósimu cursu busquen un plan d’estabilidá que dexe afitar un venceyu contractual estable, daqué que “solo va ser posible con un nuevu alcuerdu d’interinos n’Asturies que ponga fin al actual, que xenera graves problemes d’inestabilidá al rebaremar les llistes depués de cada convocatoria, elementu que precariza al profesoráu interín”.

Redaición InfoAsturies

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies