Representantes d’Andecha Astur y del Coleutivu de Familiares de Represaliaos acudieron al alcuentru astur-vascu cellebráu na llocalidá vizcaina de Larrabetzu en recuerdu a los milicianos asturianos y a los gudaris vascos que cayeron en combate defendiendo la llocalidá

Los asturianos mandaron al Euskal Herria cerca de veinte mil homes y muyeres pente abril y xunu de 1937, de los que centenares  cayeron na defensa de Bilbao. A defender Larrabetxu  acudió’l batallón Mateotti, de Sama, que por ello tien de magar l’añu 2013 la consideración de “Ciudadanos d’honor” n’agradecimientu al so valor.

La parte más emotiva del homenaxe, que se cellebra añalmente dende’l descubrimientu, gracies a la confesión póstuma d’un vecín, de la fosa onde tan enterraos, ye precisamente la visita d’esta fosa, na viesca de Bolumburu, onde s’enterraron los cuerpos de más de 130 defensores de la ciudá.

Nuria Prendes

This work is licensed under a Creative Commons Attribution 4.0 International License.