Reciella apurre a 86 escueles asturianes el reconocimientu “Escuela Afayadiza”

  • 19 Xuño, 2018

Reciella amplía esta iniciativa, qu’entamó l’añu pasáu nel conceyu de Xixón, a les escueles de toa Asturies, reconociendo con una  insinia les escueles con un altu númberu de matriculación n’asignatura d’Asturianu

Coincidiendo col final del cursu, l’asociación Reciella (families pol asturianu) entrega les sos insinies “Escuela Afayadiza”, unes pegadielles que les escueles d’Educación Primaria tienen oportunidá de poner na entrada los centros, renovándoles cursu tres cursu.

Los reconocimientos entamaron l’añu pasáu nel conceyu de Xixón, y esti cursu 2017-2018 Reciella amplíalos a los centros de toa Asturies nos que s’imparte l’asignatura de Llingua Asturiana, y son de tres tipos: “Reconocimientu d’oru”, pa la escuela o escueles con un mayor porcentaxe de matriculación; “Reconocimientu de plata”, pa les que tienen una matrícula igual o superior al 75%; y “Mención especial”, en reconocimientu a dalguna escuela que por dellos factores trescendentes, tenga de ser destacada nel cursu.

Dende l’asociación quieren treslladar asina que nesti momentu, que tanto se valoren los sellos de calidá, hai un númberu importante de families como ellos, pa les que l’apueste decidíu de la escuela pol plurillingüismu ye importante a la hora de matricular a los rapacinos. Por esa razón paezyos importante visibilizar el compromisu de la comunidá educativa d’estes escueles, pues nun se yos escapa que, anque la matriculación na asignatura, al ser voluntaria, depende de la decisión de les families, los claustros, equipos directivos y el bon llabor docente tienen muncho que dicir na visibilización, promoción, información y comunicación a les families de les ventayes y la importancia que tien pa los escolinos l’asignatura d’Asturianu, cumpliendo asina amás la llei vixente; tanto l’Estatutu d’Autonomía como la Llei d’Usu falen espresamente de que se promoverá dende les instituciones la enseñanza del asturianu, respetando la voluntariedá de les families.

27 escueles col 100%

El “Reconocimientu d’oru” ye compartíu ente 27 escueles que tienen un 100% de matriculación na asignatura d’asturianu y que tán asitiaes en tola xeografía asturiana. El “Reconocimientu de plata”, que reconoz a les escueles con una matriculación superior al 75% de matriculación va entregase esti cursu a 57 escueles asturianes.
Pa cabu la “Mención Especial” apúrrese-yos a los 6 centros pilotu qu’entamaron esti añu cola enseñanza del asturianu como llingua vehicular, -una iniciativa perimportante y que dende Reciella camienten que marca un camín pel qu’hai que trabayar- y a les escueles concertaes que tienen una matriculación alta. Nesti sen, apúrreseyos tanto a los que perpasen el 75% y tienen polo tanto tamién el reconocimiento de plata, como a dos centros d’Uviéu y Xixón, Sagrada Familia y Patronato San José, que tienen les cifres más altes de matriculación n’asturianu ente los centros concertaos nos sos conceyos.
Dende Reciella animen al restu de centros concertaos a que sigan l’exemplu de los 6 centros qu’esti añu lleven la Mención Especial y caminen hacia un modelu trillingüe, dando-y al Asturianu la importancia que-y correspuende pa la formación integral de los escolinos n’Asturies y les ventayes cognitives que supón l’adquisición de les llingües n’edaes tempranes.

Les ventayes de cursar asturianu
Son munches les razones pa deprender la llingua asturiana: aumenta la nuestra competencia comunicativa, ayúdanos nel aprendizaxe d’otres llingües, sensibilízanos con otres realidaes culturales y llingüístiques, avéranos a la nuestra cultura, y arriquez el nuestru conocimientu y percepción del mundu.

Amás na asignatura d’Asturianu, los escolinos y escolines fórmense tamién de forma adicional nel conocimientu de la Cultura Asturiana. Insisten na necesidá de que nos centros s’informe más allá del impresu de matrícula pa que la información que-yos aporte a les families seya la más afayadiza y de la obligación llegal y estatutaria que tienen los centros na promoción de l’asignatura, daqué que nun siempre se cumple.

 

Redaición InfoAsturies

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

This site uses Akismet to reduce spam. Learn how your comment data is processed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies