Los ecoloxistes reclamen la veda’l Ríu Esva

  • 14 Xunu, 2018

La Coordinadora Ecoloxista vuelve reclamar a la Conseyería d’Infraestructures del “Principado” que vede por tres años la pesca fluvial nel ríu Esva, propuesta que lleváben repitiendo dende va años, seique nesta ocasión tienen especial esperanza de ser escuchaos

El descensu evidente de la población salmonera y de truches nel Ríu Esva esmolez a estremaos seutores de la población, anque por distintos motivos. Sicasí, los ecoloxistes denuncien que la Conseyería considera como únicos interlocutores válidos pa esta cuestión a los pescadores, y tampoco a toos, sinón a los integraos  n’asociación nomada “la Socala”, que primeramente paecíen tar acordies con la mesma propuesta de veda qu’agora refuguen, con argumentos como que: “últimamente pésquense namás diez o quince exemplares”, daqué que si daqué evidencia ye la situación de riesgu de desapaición de la especie nun ríu nel que va trés décades pescáronse 805 salmones, devasando les captures realizaes el mesmu añu nel Narcea, Eo o Cares.

Dende la Coordinadora Ecoloxista consideren imprescindible pa la recuperación de la fauna del ríu Esva -non yá solo de los salmónidos- un plan más complexu, qu’amás de la veda total propuesta primeramente, incluya de manera preferente el desaniciu de toles torgues a los fluxos migratorios de los pexes esistentes nel calce, como son los cálceres en desusu y l’adecuación de los qu’entá s’utilicen, torgando  la entrada de pexes nes canales de derivación, como asocede na mini central esistente en Brieves. Coles mesmes consideren importante erradicar los arramaos, tantu urbanos como ganaderos, qu’entá se producen nel ríu.

Ta nidio qu’estes midíes, deben de dir acompañaes d’un gran refuerzu de la xixilancia mediuambiental nel ríu, tantu n’efeutivos como n’efeutividá, con cuenta de controlar el furtivismu, entá abondo presente nel ríu Esva.

Reivindiquen el ríu como daqué más que “un viveru de truches y salmones onde un colectivu más o menos amenorgáu realice l’actividá de pesca, y que eso suponga la reconocencia d’ellos como propietarios del ríu y de lo que’l mesmu contien. El ríu ye propiedá de toos, prautiquen o non la pesca ya’l so esfrute ten de ser xestionáu conducentemente pola alministración dende un puntu de vista de responsabilidá, y va haber que velo como un ecosistema realmente complexu onde toles especies presentes nél tienen derechu propiu a tar ende”.

Redaición InfoAsturies

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies