Mañana 9 de Xunu cellébrase la XXII Fiesta pola Oficialidá en Bimenes. Tolos asturianos tan llamaos a acompangar a los yerbatos nesta fecha de vindicación llingüística

Pa los que lluchen polos drechos llingüísticos del pueblu asturianu, el Conceyu  Bimenes ye un exemplu de coherencia ya una demostración práutica de la viabilidá d’un proyeutu asturianu n’asturianu, en pie pesi a los costantes intentos de baltalu.

Pa Lola Suari, responsable de la estaya de llingua d’Andecha Astur, na actual situación de tensión llingüística esta folixa tien más significáu qu’enxamás. “mientres la indefinición de los partíos con vraeru poder pa declarar la Oficialidá nos tienen dando vueltes en reondo pente declaraciones valeres y contradicciones internes, más de dos décades d’Oficialidá en Bimenes son la preba apalpable de que non solo ye posible, sinón positivo”

Tamién recalcó que la Oficialidá nun ye una pallabra valera, sinon “un conceutu llegal claru y concretu que nun almite interpretaciones adautaes al gustu”.

La folixa entamará mañana al mediudíe, cola tradicional llectura de pregón pola Oficialidá y baille de la Danza Prima delantre la Casa Conceyu de Martimporra, en Bimenes.

Redaición InfoAsturies

This work is licensed under a Creative Commons Attribution 4.0 International License.