Esta raza, ampliamente espardía nel mediu rural asturianu, tuvo a piques de desapaecer por mor del espoxigue que nos años 50 y 60 tuvieron especies foriates. Entama la so recuperación pente’l 1980 ya’l 1990, afitándose cola creación nel añu 2003 l’Asociación de Criadores de la Pita Pinta Asturiana (ACPPA), que trabaya pa conseguir la so conservación y meyorar los aspeutos productivos d’esta raza, ensin dexar de preservar el so calter desemeyáu.

La Pita Pinta Asturiana vien del troncu Atlánticu de la especie, ye viviega,  de tamañu mediu, y distínguese por tener les plumes blanques y prietes ya’l picu y pates marielles con pintes prietes. Ye perbona criadora y ponedora, siempres que se-y dexe en semillibertá, siendo mui apreciaos los sos güevos y la so carne. Hai cuatro variedaes: pinta en prieto, pinta roxa, prieta y blanca, siendo les más carauterístiques les pinta en prieto.

Nesti casu, Víctor Manuel Iglesias, criador y espertu nesta especie aviar autóctona asturiana, sedrá quien esponga les particularidaes y la situación actual d’esti ave, cola presentación de Fernán Morán, presidente de la Lliga.

Comu ye vezu nes charres de la Lliga Celta d’Asturies, la entrada ye llibre y de baldre dica completar aforu y ye apto pa tolos públicos.